Властите во Пакистан соопштија дека привремено ги запираат воените напади врз цели во Авганистан, одлука донесена по дипломатско посредување на Саудиска Арабија, Турција и Катар, со цел да се овозможи мирно одбележување на муслиманскиот празник Рамазан Бајрам.
Пакистанскиот министер за информации и радиодифузија, Атаула Тарар, прецизираше дека прекинот на нападите насочени против „терористите и нивните логистички објекти во Авганистан“ стапува во сила денеска на полноќ и ќе трае до следниот понеделник. Тарар го опиша потегот како „гест на добра волја“ во согласност со исламските норми, но истовремено упати остро предупредување дека во случај на каква било провокација, напад со дрон или терористички инцидент од преку границата, воените операции ќе продолжат веднаш со уште поголем интензитет.
Ова примирје доаѓа по најкрвавата недела во ескалирачкиот конфликт меѓу двете земји, кој трае веќе три недели. Во Кабул денеска се подготвуваа масовни погреби за жртвите од пакистанскиот воздушен удар врз центар за лекување зависности, што се смета за најсмртоносен напад досега. Според авганистанските власти, во конфликтот досега загинале 408 лица, а 265 се ранети, иако овие бројки сè уште не се потврдени од независни извори.
© Vecer.mk, правата за текстот се на редакцијата
