Петмина Тајланѓани се смееја кога влегоа во салата за пристигнувања на аеродромот Суварнабхуми во Бангкок, откако беа ослободени на 30-ти јануари како дел од договорот за прекин на огнот чија цел беше да се стави крај на војната во Газа.
Воачара Сријаун, Понгсак Тана, Сатиан Суваннакам, Сурасак Ламнау и Банават Саетао денеска слетаа во Бангкок во 7.30 часот и беа пречекани од мала група пресреќни роднини и службеници од Министерството за надворешни работи.
Понгсак им кажа на новинарите дека останал без зборови кога го видел своето семејство.
„Им благодарам на сите што ни помогнаа да излеземе. Немаше да бидеме овде денес да не беа тие. Конечно можевме да се вратиме во нашата татковина“, рече тој.
Сомбун Саетао, таткото на Банават, рече дека е „толку среќен“ и дека неговиот син ќе биде пречекан дома од неговото семејство со традиционална тајландска церемонија.
„Мислам дека не би сакал повторно да бидам далеку од дома“, изјави за АФП Сомбун, кој доаѓа од провинцијата Нан во северен Тајланд.
Банават се преселил во Израел девет месеци пред киднапирањето во потрага по подобар приход за неговото семејство, додаде тој.
Министерот за надворешни работи Марис Сангиампонса рече дека е „многу инспиративно“ да се биде сведок на нивното враќање и дека официјалните лица ќе ја следат нивната реинтеграција во тајландското општество, „фокусирајќи се на нивното ментално здравје“.
Петмината повратници сега се на пат кон нивните места на живеење.
Бунсонг Тапчајут, претставник на Министерството за труд, изјави на аеродромот дека секој заложник ќе добие еднократна исплата од околу 18.000 долари, заедно со месечна плата од 900 долари до 80-годишна возраст, за да се осигура дека нема да мора да се вратат во Израел.
Кога Хамас го нападна Израел на 7 октомври 2023 година, 31 Тајланѓанец беа киднапирани, 23 беа ослободени до крајот на истата година, а двајца беа потврдени мртви во мај.
Се верува дека еден тајландски државјанин сè уште е жив во Газа.
Вкупно 46 тајландски работници се убиени од октомври 2023 година, според Министерството за надворешни работи во Бангкок, повеќето во нападите на Хамас, а некои од ракетите истрелани од либанскиот Хезболах.
© Vecer.mk, правата за текстот се на редакцијата
