Разговори за прекин на огнот во Газа
Високи претставници на израелската влада во сабота ќе одржат состанок за најновите обиди за примирје со Хамас, организација која е означена како терористичка од САД.
Хамас во петок ја испрати својата реакција на предложената рамка за примирје, оценувајќи ја како „позитивна“. Ова значи дека групата е подготвена да започне разговори за воспоставување прекин на огнот.
Според извештаите, Хамас бара Израел да направи отстапки околу три клучни точки: измена на начинот на влез на хуманитарна помош во Газа за време на примирјето, оддалечување на израелската војска за време на паузата и јасно дефинирана подготовеност за целосно завршување на војната.
Најновиот предлог предвидува примирје кое би траело 60 дена, во кое би се разменувале заробеници и затворени Палестинци, израелската војска би се повлекла до договорени линии, додека медијатори би се ангажирале за да се постигне конечно решение за конфликтот. Претседателот Доналд Трамп оваа недела објави дека Израелците се согласуваат со условите за 60-дневно примирје.
Моите претставници имаа долг и продуктивен состанок со Израел за прашањето во Газа. Израел прифати неопходни услови за постигнување на 60-дневен ПРЕКИН НА ОГНОТ; за време на овој период, ќе работиме со сите страни за конечно да ја завршиме војната. Катарците и Египќаните, кои вложија големи напори за мир, ќе го испорачаат финалниот предлог. Се надевам, за доброто на Блискиот Исток, дека Хамас ќе ја прифати понудата, бидејќи подобра нема да има—ќе биде само полошо.
Трамп најави дека во понеделник ќе се сретне со израелскиот премиер Бенјамин Нетанјаху, со надеж овие разговори да се заокружат со договор. Поранешниот израелски амбасадор во САД, Михаел Орен, оцени дека оваа средба може да биде „клучен пресврт“, при што Тој истакна дека сојузниците би можеле да слават заедничка победа.
Сепак, останува неодредено колку далеку е подготвен Нетанјаху да оди кон дипломатско решение. Тој и понатаму инсистира на тотална елиминација на Хамас, додека самата група, која стои зад нападите на 7 октомври 2023 година, сака да остане на власт по завршувањето на војната. Претходно, Хамас се изјаснуваше дека е подготвен за разговори, но бараше повеќе од тоа што Израел беше подготвен да даде.
Ви велам: повеќе нема да има Хамас. Нема да има нова Хамастан. Тоа заврши. Ќе ги ослободиме сите наши заложници. Можеби ова изгледа контрадикторно, но целите одат заедно. Ова ќе го завршиме заедно – ќе ја елиминираме Хамас до темел.
Новата понуда за примирје во многу нешта личи на прекините на огнот од ноември 2023 и од периодот јануари-март 2025 година. Трамп за медиумите изјави дека е „оптимист, иако ситуацијата се менува од ден на ден“.
Најголем адут на Хамас се околу 50-те заложници што се уште ги држи во Газа – Израел смета дека 20 од нив во моментов се живи. Нетанјаху во четвртокот порача дека чувствува „длабока одговорност“ да ги врати сите заложници.
Воените фронтови се шират
Покрај конфликтот со Хамас, Израел неодамна започна 12-дневна војна со Иран, со цел да го ограничи нуклеарниот програм. Израел успеа да оштети неколку клучни објекти и со помош на САД да елиминира истакнати воени команданти и нуклеарни научници. Михаел Орен смета дека војната ја зацврстила позицијата на Нетанјаху и би можела да придонесе за поголема флексибилност во следните преговори.
Со оваа зголемена флексибилност, Нетанјаху може да продолжи со борбите во Газа, каде што конфликтот трае повеќе од 20 месеци и однесе илјадници животи. Министерството за здравство во Газа, управувано од Хамас, тврди дека досега загинале над 57.000 луѓе од почетокот на војната.
© Vecer.mk, правата за текстот се на редакцијата
