Воените бродови на американската морнарица распоредени на Блискиот Исток се најдоа во тесно - цело време под висок оперативен притисок во деноноќна битка против нападите на јеменските Хути.
Хутите, од друга страна, рутински се соочуваат со акциите на групата предводена од Соединетите Држави, која неуспешно се обидува да ги задржи веќе пет месеци.
Сето ова ја претвори поморската рута во Црвеното Море и Аденскиот Залив во опасен и смртоносен коридор, наведува „Бизнис инсајдер“.
Хутите нападнаа повеќе бродови минатата недела, а американските власти велат дека веројатно нема да заврши наскоро, што предизвикува загриженост дека САД се заглавени во скап и неодржлив конфликт.
На тој начин Хутите успеаја да го вовлечат Вашингтон во продолжен конфликт кој не само што ги троши ресурсите, туку и ги зголемува трошоците за испорака на стоки низ светот бидејќи товарните бродови ја избегнуваат оваа критична морска рута.
Иако американските власти негираат дека бил погоден воен брод, за разлика од Хутите кои тврдат дека го нападнале носачот на авиони „Двајт Ајзенхауер“, САД прават големи финансиски трошоци и ги „преупотребуваат“ своите воени бродови.
Ударната група на носачи Двајт Ајзенхауер, која вклучува неколку други воени бродови, досега истрелала повеќе од 500 проектили, а нејзините авиони летале десетици илјади часа, објавија претставници на морнарицата.
Само потрошената муниција чинеше речиси милијарда долари, откри во средината на април секретарот на морнарицата Карлос дел Торо, сума што сега е секако поголема.
Сепак, експертите велат дека Пентагон може да си ги дозволи трошоците за ракетите и дека САД се загрижени за трошоците за одржување на воените бродови од кои се лансираат ракетите, особено ако се има предвид дека дел од флотата веќе го напушта Црвеното Море за повторно вооружување.
Иако американските сили извршија неколку рунди заеднички напади со Велика Британија, гаѓајќи ги објектите и средствата на Хутите низ Јемен и уништувајќи ракети и беспилотни летала пред да бидат лансирани, директорката на Националното разузнавање Аврил Хејнс верува дека „не е доволно“ да се запрат бунтовниците, додека експертите велат дека воената стратегија на Америка во голема мера е неуспешна.
„Мислам дека, за жал, администрацијата на Бајден се најде во ситуација кога, поради нападот на Хутите врз комерцијалниот превоз, мора да „направи нешто“, дури и ако воената опција не е особено ефикасна за да се стави крај на проблемот“, изјави за Business Insider Брајан Финукејн, поранешен адвокат во Стејт департментот.
Покрај тоа, трговската штета не треба да се занемари.
Според извештајот на Одбранбената разузнавачка агенција, од февруари, превозот преку Црвеното Море, кој вообичаено сочинува до 15 отсто од меѓународната поморска трговија, е намален за околу 90 отсто од декември 2023 година.
Бродовите по алтернативната рута околу Африка додаваат време и трошоци за нивните патувања, што влијае на интересите на најмалку 65 земји.
„Хутите успеаја да го нарушат еден од примарните национални безбедносни интереси во регионот, а тоа е слободниот проток на трговија и стоки. Од нивна гледна точка, ова мора да се гледа како успех“, пвели ензионираниот генерал Џозеф Вотел, кој беше командант на Централната команда на САД во 2010-тите.
САД и Велика Британија го нападнаа јеменскиот остров Камаран и аеродромот во Худајда
Американските и британските сили извршија најмалку шест воздушни напади врз јеменскиот меѓународен аеродром Худаида и четири на островот Камаран, во близина на пристаништето Салиф на Црвеното Море, објави телевизијата Ал Масира, главната телевизиска станица на јеменските Хути.
Нападите на Камаран се први напади на коалициските сили предводени од САД на тој остров откако почнаа воздушните напади врз цели на Хутите на почетокот на февруари.
Меѓународно признатата влада на Јемен верува дека борците Хути во минатото ги користеле островот Камаран и пристаништето Салиф како место за лансирање на нападите на Црвеното Море, како и криење на залихи проектили и беспилотни летала во рудниците за сол, изјавија два владини воени извори за Ројтерс.
10-те километри море што се протега од пристаништето Салиф до островот Камаран е исто така дел од рутата што треба да ја поминат бродовите за да стигнат до следното пристаниште.
Хутите, кои го контролираат главниот град на Јемен и најнаселените области во земјата, од ноември минатата година напаѓаат меѓународни трговски бродови во Црвеното Море во знак на солидарност со Палестинците во Газа.
И покрај репресалиите на американската и британската коалиција, како и на другите морнарици, Хутите продолжија да ги ескалираат нападите врз трговските бродови на една од најпрометните поморски трговски патишта во последниве месеци.
© Vecer.mk, правата за текстот се на редакцијата
