Портпаролот на нигерискиот претседател Бола Тинубу, Сандеј Даре, изјави дека ниту еден од 303-те ученици од католичкото училиште „Света Марија“ во државата Нигер, киднапирани на 21 ноември, веќе не е во заробеништво.
Ден Атори, портпарол на Христијанската асоцијација на Нигерија (CAN) во државата Нигер, за ДПА изјави дека се очекува децата денеска да пристигнат во главниот град на државата, Мина.
Според медиумските извештаи, децата биле ослободени уште во петокот, но проблеми со транспортот го одложиле нивното пристигнување. Извештаите наведуваат дека децата биле ослободени во регионот Боргу, оддалечена и тешко достапна област.
Децата беа киднапирани на 21 ноември. Во тоа време, беа киднапирани 303 деца и 12 наставници од католичкото училиште „Света Марија“ во заедницата Папири. Мнозинството од киднапираните беа ученици од основно училиште на возраст под 12 години. Според родителите, меѓу однесените деца имало и петгодишници.
Околу 50 деца успеале да побегнат веднаш по киднапирањето или биле оставени во дивината. Во последните недели постепено беа ослободувани повеќе деца.
Ниту една група официјално не ја презеде одговорноста за киднапирањата. Сепак, се верува дека е одговорна криминална банда која дејствува во регионот.
Нигерија со години се соочува со постојани масовни киднапирања од училишта, извршени од криминални банди и џихадистички групи како Боко Харам. Неколку сојузни држави во северна и централна Нигерија наредија затворање на некои или на сите училишта по последниот бран киднапирања во ноември.
Најсериозното киднапирање од овој вид беше нападот врз женското училиште во градот Чибок во 2014 година, кога исламистичката милиција Боко Харам киднапираше 276 ученички. Осумдесет и две од девојчињата сè уште се водат како исчезнати.
© Vecer.mk, правата за текстот се на редакцијата
