- Дополнителен систем за ракетна одбрана „Патриот“ ќе биде распореден во јужната турска провинција Адана - изјави портпарол на турското Министерство за одбрана на брифинг во базата на НАТО во Инџирлик.
Системот ќе биде префрлен од американската база Рамштајн во западна Германија.
Портпарол на НАТО посочи дека новиот систем ќе обезбеди „дополнителни капацитети за понатамошно зајакнување на одбранбената поставеност на Алијансата против потенцијални закани“.
Овој систем ќе се надоврзе на веќе постојните два во Турција, меѓу кои и оној што Шпанија го има стационирано во земјата повеќе од една деценија.
Поради оперативна безбедност, не се објавени дополнителни детали за распоредувањето.
Од почетокот на конфликтот со Иран кон крајот на февруари, три ракети испукани од Иран биле пресретнати од НАТО-системи на јужната турска граница, последен пат во петокот.
Според медиумски извештаи, во базата во Инџирлик, каде што се распоредени и американски војници, биле активирани сирени.
Минатата недела Турција веќе ги засили своите одбранбени капацитети со распоредување дополнителен систем за ракетна одбрана во источната провинција Малатија.
© Vecer.mk, правата за текстот се на редакцијата
