Координацијата на испораките ќе се врши во соработка со рафинериите, објави министерството, без да даде детали за количината на керозин или роковите за испорака. Израел, исто така, ќе разгледа како може да ѝ помогне на Германија да го реши проблемот со природниот гас, додаде министерството.
Министерски договор
Потегот беше договорен од министерот за енергетика Ели Коен и министерот за надворешни работи Гидеон Сар, се вели во соопштението на израелското министерство, истакнувајќи дека Сар го најавил потегот на својот германски колега за време на посетата на Берлин.
Со приближувањето на врвот на летната туристичка сезона, во Европа расте загриженоста за можен недостиг на керозин поради прекини во снабдувањето од Блискиот Исток предизвикани од војната против Иран, потсетува Ројтерс.
Криза во воздушниот сообраќај
Цените на горивата скокнаа откако нападите на САД и Израел врз Иран го нарушија сообраќајот низ клучниот Ормуски теснец, што доведе до најголемата криза во воздушниот сообраќај од пандемијата COVID-19.
Германското министерство за економија соопшти дека Израел изразил подготвеност да го поддржи Берлин со испораки на керозин и природен гас, додавајќи дека деталите и количините сè уште не се достапни бидејќи компаниите мора сами да преговараат за условите на поединечните договори.
Во посебна изјава, портпаролот на министерството рече дека Германија во моментов не се соочува со физички недостиг на енергија, додавајќи дека министерството е во контакт со авијациските компании за да ги следи потенцијалните ефекти од кризата и брзо да воведе целни контрамерки доколку е потребно.
© Vecer.mk, правата за текстот се на редакцијата
