Повикувајќи се на свои извори, Киев Пост пишува дека „состанокот во Брисел е откажан“ и оти Зеленски се враќа во Украина.
Според Киев Пост, Кремљ тврдел дека Виткоф и Кушнер „ветиле“ дека ќе летаат директно за Вашингтон по разговорите со рускиот лидер Владимир Путин во Москва, изјава која не е потврдена од американската страна.
Причината за откажувањето сè уште не е објавена.
Украинскиот претседател Володимир Зеленски на Телеграм напиша дека секретарот на Советот за национална безбедност и одбрана, Рустем Умеров, го информирал за подготовките за денешните состаноци во Брисел со советниците за национална безбедност од европските земји.
На Умеров ќе му се придружи и началникот на Генералштабот на Украина, Андриј Хнатов.
- Украинските претставници ќе ги информираат своите европски колеги за она што е познато по вчерашните контакти на САД во Москва, а исто така ќе разговараат за европската компонента на неопходната безбедносна архитектура, рече Зеленски.
Тој додаде дека по Брисел, Умеров и Хнатов ќе се подготват за средба со претставници на претседателот Доналд Трамп во САД.
„Како и секогаш, Украина ќе работи конструктивно за вистински мир. Со нетрпение го очекувам новиот извештај за резултатите од денешните состаноци во Европа“, наведе Зеленски.
© Vecer.mk, правата за текстот се на редакцијата
