Џонатан Герлах (34) бил уапсен на гробиштата Маунт Морија во предградието на Филаделфија додека носел торба со мумифицирани остатоци од деца и неколку черепи, пишува Скај њуз.
Потоа, полицијата открила бројни долги коски, мумифицирани раце и стапала, тела во фаза на распаѓање и предмети од коски во домот на Џонатан Герлах и во складиштето што го поседувал. „Беа во различни состојби. Некои беа обесени, така да се каже. Некои беа составени, а некои беа само черепи наредени на полица“, изјави окружниот обвинител на округот Делавер, Танер Раус.
Истрагата е покрената по серија провали на гробиштата Маунт Морија, кои се протегаат на 160 хектари и содржат околу 150.000 гробови. Полицијата тврди дека Герлах намерно провалувал во древни мавзолеи и подземни гробници, оштетувајќи камени плочи за да стигне до остатоците.
Тој е уапсен со лопата во рацете
Властите соопштија дека пронашле и накит за кој се верува дека е поврзан со гробовите, а во еден случај, пејсмејкер сè уште бил прикачен на останките. Мотивот зад кражбата на останките, од кои некои се стари стотици години, засега е нејасен.
Герлах беше уапсен пред три дена со лопата, а според судските документи, тој признал дека украл приближно 30 „сетови“ човечки останки. Тој се соочува со 300 обвиненија за кражба, примање украден имот и злоупотреба на труп.
Тој е обвинет и за десетици дополнителни обвиненија за сквернавење на јавен споменик, почитуван предмет и историско гробно место. Властите беа информирани за сквернавењето на гробиштата од непрофитно здружение кое работи на зачувување на гробиштата, потврди градоначалникот на Једон, Рохан Хепкинс.
© Vecer.mk, правата за текстот се на редакцијата
