„Во наш заеднички интерес е без одлагање да се спроведе мораториум на нападите насочени кон цивилната инфраструктура, особено објектите за снабдување со енергија и вода“, објави Макрон на Х.
„Цивилното население и неговите основни потреби, како и безбедноста на снабдувањето со енергија, мора да бидат заштитени од воена ескалација“, додаде тој.
Макрон соопшти дека разговарал со Ал Тани и Трамп „по нападите што ги погодија капацитетите за производство на гас во Иран и Катар“ во средата.
Катар е еден од најголемите светски производители на гас и исто така игра клучна улога во глобалното снабдување со течен природен гас (ЛНГ).
Во моментов, речиси ниеден брод не поминува низ Ормускиот Теснец, критична поморска рута за транспорт на нафта и гас, поради страв од напади од Иран. Техеран лансираше ракетни напади и напади со дронови низ регионот и постави мини во стратешки важниот теснец како одговор на американско-израелската офанзива што почна на 28 февруари.
Неодамна се појавија и стравувања дека завојуваните страни би можеле сè повеќе да ја гаѓаат виталната инфраструктура за снабдување со вода за населението во Иран и во заливските држави, вклучувајќи ги и постројките за отсолување, пренесе ДПА.
Во Бахреин, важна постројка за третман на вода за пиење беше погодена во ирански напад пред неколку дена. Имаше и извештаи за напад врз постројка за отсолување во Иран.
© Vecer.mk, правата за текстот се на редакцијата
