Про-палестинскиот активист Махмуд Халил одби да даде недвосмислена осуда за терористичката организација Хамас во гостувањето на американската телевизија CNN, изјавувајќи дека не прифаќа „селективна осуда“.
Халил беше уапсен во март, за време на мерките на администрацијата на Трамп против студентските протести во знак на поддршка на Палестина, среде војната во Газа. Тој помина 104 дена во притворен центар во Луизијана.
Во емисија на CNN, од Халил беше побарано да го осуди Хамас, на што тој одговори дека бил „многу јасен“ во неговата позиција против убиството на сите цивили, без разлика од која страна.
„Не е искрено да се бара од мене да го осудам Хамас додека во моментов Палестинците гладуваат поради израелските политики. Не се споменува ни 6 октомври, кога Израел уби 260 Палестинци пред нападите на 7 октомври,“ изјави Халил.
„Го мразам ова селективно инсистирање на осуда, бидејќи тоа нема да донесе конструктивен дијалог,“ додаде Халил.
Водителката Памела Браун неколкупати повтори прашањето, истакнувајќи дека администрацијата на Трамп го етикетира Халил како симпатизер на Хамас. Халил пак, нагласи дека само протестирал против војната во Газа и повтори дека селективната осуда не води до решение.
Министерството за домашна безбедност на САД сподели видео од изјавата на Халил на X (поранешен Twitter), тврдејќи дека тој избегнува да го осуди Хамас бидејќи всушност е симпатизер на терористите. Министерството исто така потенцираше дека неговото притворање е согласно овластувањата на тогашната Трамп-администрација.
Адвокатите на Халил поднесоа тужба против администрацијата на Трамп во јули поради апсењето од страна на имиграциските власти. Со тужбата се бараат 20 милиони долари отштета. Сепак, Халил изјави дека би се откажал од барањето доколку администрацијата се извини.
© Vecer.mk, правата за текстот се на редакцијата
