- Еден дел од точките на планот за Украина се прифатени за време на разговорите меѓу Путин и Виткоф, дел е означен како неприфатлив. Тоа е работен процес, рече Песков и додаде дека колку повеќе преговорите се водат во тишина, толку ќе бидат попродуктивни.
Тој соопшти и дека Русија се надева оти американската страна ќе се придржува до принципот на тишина за време на преговорите за решение.
Портпаролот на Кремљ додаде дека е можен телефонски разговор меѓу Путин и американскиот претседател Доналд Трамп. „Телефонски разговор е можен во секој момент. Постои можност да биде оперативно организиран“, рече Песков.
Вчерашниот разговор меѓу претседателот на Русија, Владимир Путин, и американскиот специјален пратеник Стив Виткоф беше корисен, конструктивен и значаен, изјави претходно советникот на Путин, Јуриј Ушаков.
Тој рече дека разговорот „не траел пет минути, туку пет часа“.
– Разговаравме за неколку опции за ставање крај на војната во Украина. Се договоривме со американските колеги да не ја откриваме содржината на преговорите. Разговорот беше доверлив, рече Ушаков.
© Vecer.mk, правата за текстот се на редакцијата
