Со истекот на договорот „Нов СТАРТ“ двата најголеми нуклеарни арсенали САД и Русија влегоа во нова фаза на неизвесност. Москва во моментов настојува на обнова на истечениот договор, Вашингтон пак, бара целосно нов. Претедателот Трамп оцени дека договорот бил лош и често прекршуван од руска страна. На социјалните мрежи тој побара секое идно решение да ја вклучува и Кина, а неговата порака денеска ја повторија и од Стејт Департментот.
-Претседателот (Трамп) појасни повторно синоќа дека сака нов договор и видете во суштина „Нов СТАРТ“ имаше недостатоци, не ги опфати целосно договорените нуклеарни оружја и не ја опфати Кина. - Томас ДиНано – Потсекретар на САД за контрола на оружје
Официјален Кремљ пак, со порака дека ќе останат одговорна нуклеарна сила и покрај истекот на Договорот. Портпаролот Песков вели дека и Вашингтон и Москва ја потврдиле подготвеноста за преговори.
-Постои разбирање, вклучително и ова беше дискутирано во Абу Даби, дека двете страни ќе заземат одговорни позиции. Двете страни ја признаваат потребата од започнување преговори за оваа тема што е можно поскоро.- Дмитри Песков – Портпарол на Кремљ
Барање за обвнова на дијалогот и постигнување на некаков договор испратија и од Обединетите Нации кои порачаа дека двете страни мора да изнајдат некакво решенеи кое би ги намалило ризиците и би ја зајакнало заедничката безбедност.
-За прв пат по повеќе од половина век, се соочуваме со свет без никакви обврзувачки ограничувања за стратешките (нуклеарни) арсенали и за Руската Федерација и за Соединетите Американски Држави. Генералниот Секретар Гутереш ги повикува двете држави без одложување да се вратат на преговарачката маса и да се договорат за рамка за нов договор што ќе ги врати ограничувањата, ќе ги намали ризиците и ќе ја зајакне нашата заедничка безбедност.- Стефан Дужарик – Портпарол на ООН
Договорот, потпишан во 2010 година од Барак Обама и Дмитриј Медведев, поставуваше строги ограничувања за бројот на распоредени нуклеарни боеви глави и нуклеарни подморници, како и механизми за меѓусебни инспекции што со години обезбедуваа предвидливост меѓу двете најголеми нуклеарни сили.
© Vecer.mk, правата за текстот се на редакцијата
