Владата на израелскиот премиер Бенјамин Нетанјаху се наоѓа на работ на распад, откако ултраортодоксната партија Обединет јудаизам на Тората (UTJ) ја напушти владината коалиција.
Партијата во понеделникот ги повлече своите пратеници, незадоволна од одлуките за задолжително регрутирање на нивните верници во израелската армија.
Членовите на UTJ одамна предупредуваа дека ќе ја напуштат владата доколку не се обезбедат сигурни законски гаранции дека учениците од верските училишта (ешиви) ќе бидат изземени од задолжителната воена служба.
Со напуштањето на коалицијата, оставки поднесоа и неколку високи функционери, а меѓу нив и министерот за прашања на Ерусалим, Мир Поруш, претседателот на финансискиот комитет на Кнесетот, Моше Гафни, и заменикот министер за транспорт, Ури Маклев.
UTJ е политички сојуз на две ултраортодоксни групи: хасидската Агудад Израел и литванската Дегел хаТора.
Во писмо кое го предвиде распадот, рабин Дов Ландо од Дегел хаТора остро ја критикуваше владата: „Со намера повторно да ја влошат ситуацијата на нашите ученици по Тората, на секој можен начин – преку понижување и газење. Бидејќи постојано не ги исполнуваат ветувањата за регулирање на правниот статус на ешива-студентите и научниците, сметаме дека учеството во оваа влада треба веднаш да запре“.
Останувањето без поддршката на UTJ значи Нетанјаху ќе располага со минимално мнозинство во Кнесетот – 61 од вкупно 120 пратеници.
Во меѓувреме, шпекулациите се дека уште една ултраортодоксна партија, Шас, исто така разгледува заминување од коалицијата. Доколку тоа се случи, владата на Нетанјаху го губи парламентарното мнозинство.
Местото на ултраортодоксните во општеството одамна предизвикува поделби во Израел. Од основањето на државата, евидентно е дека оние кои посветуваат живот на изучување на Тората, ги одбегнуваат воените обврски и добиваат државни стипендии.
Таа пракса беше укината минатиот месец, откако Врховниот суд донесе историска пресуда со која задолжи и ултраортодоксните да бидат подложни на регрутација, изедначувајќи ги привилегиите на сите граѓани.
Поддржувачите на поранешните повластици тврдат дека ултраортодоксните заедници играат клучна улога како чувари на еврејската традиција и вера.
Критичарите пак сметаат дека тоа создава нееднаквост кон световните граѓани, а дополнително алармираат на брзиот пораст на ултраортодоксното население.
© Vecer.mk, правата за текстот се на редакцијата
