Немири ширум Кенија поради полициска бруталност
НАИРОБИ – Најмалку осум лица загинаа, а повеќе од 80 се лекуваат од специјализирани повреди, вклучително и прострелни рани, по силните протести низ цела Кенија против полициска бруталност и лошо управување, информираат организации за човекови права.
Комисијата за човекови права на Кенија, која е државно тело, извести дека ги следи протестите ширум државата, при што се регистрирани над 400 повредени и повеќе од 60 уапсени лица. Масовните протести се случиле во среда, и се прошириле во 23 од вкупно 47 окрузи во земјата.
Протестите беа организирани за да се одбележи една година од ланските антиданочни демонстрации, во кои загинаа 60 лица, а 20 сè уште се водат за исчезнати.
Зградите на Парламентот и претседателската палата во главниот град Најроби беа блокирани со бодликава жица и полициски барикади на сите пристапни патишта. Илјадници демонстранти се судрија со полицијата, која употреби солзавец, гумени куршуми и пендреци, по што многумина беа повредени.
Протестите се проширија на големите градови, вклучувајќи ги Момбаса, Кисуму, Накуру и Нјехуру, и прераснаа во барање за оставка од претседателот поради лошо владеење.
Лани, демонстрантите влегоа во парламентот каде што таму беше донесен закон за зголемување на даноците, запалувајќи дел од зградата додека пратениците избегаа. На улиците се гледаа тела, а медицински лица и набљудувачи тврдеа дека полицијата отворила оган. Во градот беше воведена војска.
Младите во Кенија се сè повеќе незадоволни од актуелната власт поради корупција, високи трошоци за живот, полициска бруталност и неодамнешната смрт на блогер во полициско притвор. Последниот случај на убиство на цивил од близина за време на протестите дополнително го разгоре гневот кај граѓаните.
Претседателот Вилијам Руто ги повика граѓаните да не ја 'уништат' земјата во среда: „Немаме друга земја каде да одиме кога работите ќе тргнат наопаку. Наша одговорност е да ја чуваме својата држава безбедна“, изјавил тој од погреб во крајбрежен дел на Кенија, додека демонстрантите доаѓаа до неговата канцеларија во Најроби.
Младите Кенијци ги искористија социјалните мрежи за да ги организираат протестите во чест на загинатите минатата година. Владиниот портпарол, Исак Мваура, во понеделникот рече дека нема да има протести и дека средата е „обичен работен ден.“
И покрај тоа, малите бизниси во Најроби останаа затворени, а полицијата ограничуваше движење на возила кон центарот. Стотици граѓани уште од рано наутро беа на улиците, извикувајќи анти-владини слогани, додека полицијата го испукуваше солзавец врз некои од групите.
Новинар на Асошиетед Прес забележал како демонстрант е повреден во устата од истрелан куршум, а друг протестант бил удрен по глава од страна на специјалните полициски сили и бил пренесен со брза помош.
Вангеќи Кахурија, извршен директор на Независната медицинско-правна унија, организација која следи убиства на протести, изјави дека Кенијците треба да добијат можност да жалат и да се вратат дома.
Полицијата во вторник соопшти дека никој без дозвола нема да биде пуштен во обезбедени зони како Парламентот и претседателската палата.
Протестантот Роуз Муруги рече дека полицијата е дел од проблемот: „Ќе го кажеме гласно и храбро. Мора да престане полициската бруталност, а Руто мора да си замине.“
Друг демонстрант, Дерик Мванги (25), додаде: „Ни е преку глава како млади.“ Луѓето се киднапираат, луѓето се убиваат. Полицијата почна да користи сила, што е многу лошо.“
Во средата, локалните медиуми објавија имиња и фотографии на некои од жртвите од минатогодишните протести. На насловната страница на еден од главните весници, The Standard, стоеше пораката „A luta Continua“ (Борбата продолжува), познат слоган што потекнува од борбата за независност на Мозамбик.
Во текот на протестите, Агенцијата за комуникации ја забрани преносот во живо на демонстрациите и исклучи некои од телевизиските сигнали, поради што беше критикувана од страна на организации за човекови права.
Политичкиот аналитичар Херман Манјора ги нарече демонстрантите „херои“ кои ја платиле највисоката цена и заслужуваат да бидат запаметени. "Властите треба да соработуваат со демонстрантите за добро одбележување на годишнината," додаде тој.
Манјора сепак предупреди дека протестантите остануваат незадоволни бидејќи властите не попуштаат и дополнително ја зајакнуваат решителноста на младите да продолжат со протестите.
Минатата година, претседателот Руто го распушти Владата обвинета за корупција и неспособност, но и покрај тоа, поголемиот дел од поранешните министри останаа на функција во новото раководство.
Парламентот ја повлече една од најконтроверзните финансиски реформи поради остри реакции, но во текот на годината воведе нови даноци преку законски измени.
Претседателот Руто минатата година именуваше дел од опозициските членови во владата, а во март потпиша политички договор со својот главен изборен ривал, лидерот на опозицијата Раила Одинга.
© Vecer.mk, правата за текстот се на редакцијата
