Европскиот парламент следниот четврток ќе гласа за доверба на претседателката на Европската комисија, Урсула фон дер Лајен, поради тајните пораки што таа ги разменила со извршниот директор на „Фајзер“, Алберт Бурл, во 2021 година, за испорака на вакцини во ЕУ во екот на пандемијата на коронавирусот.
Шест функционери за „Политико“ изјавија дека фон дер Лајен ќе присуствува на парламентарна дебата во Стразбур во понеделник, по што ќе следи гласање за доверба три дена подоцна.
Ова е прв пат по повеќе од една деценија шефот на ЕУ да се соочи со таков потег.
Во оваа фаза, гласањето е во голема мера симболично - повеќето политички групи веќе сигнализираа дека ќе гласаат против предлогот за недоверба - но тоа укажува на растечкиот гнев кон фон дер Лајен во Брисел по низата контроверзни потези и скандали од неа, објави порталот во Брисел.
Доколку предлогот за недоверба биде усвоен, тоа би довело до оставка на целата ЕК и би го активирало сложениот процес на назначување на 27 нови европски комесари.
Комисијата е обвинета за нетранспарентност и лошо управување
Претседателката на Парламентот, Роберта Мецола, вечерва ги информираше лидерите на парламентарните групи за ова, јавува агенцијата ДПА. Гласањето за доверба ќе се одржи по иницијатива на романскиот конзервативен претставник Георге Пипереа.
Во документ од две страници, Комисијата е обвинета за нетранспарентност и лошо управување, особено за време на пандемијата на коронавирусот. За да се спроведе гласањето, беа потребни потписи од една десетина од вкупниот број пратеници, односно 72 од нив.
Малку е веројатно дека на Комисијата всушност ќе ѝ се изгласа недоверба бидејќи е потребно двојно мнозинство, што значи две третини од поднесените гласови и мнозинство од 720 пратеници. По минатогодишните европски избори, комисијата беше потврдена со поддршка од 370 од 688 гласови.
Преписката на фон дер Лајен и извршниот директор на Фајзер не е откриена
Во барањето за разрешување на Комисијата се наведува одбивањето да се откријат текстуалните пораки меѓу фон дер Лајен и директорот на фармацевтската компанија Фајзер. Европскиот суд на правдата неодамна пресуди во тој случај дека Комисијата сè уште не обезбедила доволно правно оправдување за задржување на информациите.
Како што претходно објави „Њујорк тајмс“, личниот контакт меѓу фон дер Лајен и извршниот директор на Фајзер, Алберт Бурла, бил клучен за постигнување договор за купување вакцина вредна повеќе милијарди евра во екот на пандемијата. ЕК, исто така, беше критикувана за задржување на неискористените вакцини против коронавирус во вредност од околу четири милијарди евра.
© Vecer.mk, правата за текстот се на редакцијата
