Двајца од највисоките израелски претставници — министерот за правда Јарив Левин и министерот за одбрана Израел Кац — го повикаа раководството на државата да го анексира Западниот Брег и да воспостави целосен израелски суверенитет над палестинското население во тој регион.
Во заедничка изјава дадена за израелските медиуми, Левин и Кац — блиски соработници на премиерот Бенјамин Нетанјаху — истакнаа дека актуелниот политички момент претставува „ретка можност“ за израелско преземање контрола врз палестинската територија.
Министрите Кац и Левин со години работат на реализација на израелскиот суверенитет во Јудеја и Самарија. Во овој момент, постои можност која не смее да се пропушти.
Изјавата беше реакција на телевизиски извештај дека министрите не го подготвуваат овој потег, што тие го нарекоа „невистина“. Понатаму беше објаснето дека Левин уште во времето на претседателскиот мандат на Трамп ги подготвил сите предуслови — од нацрт-резолуции до детални карти, додека Кац донел серија одлуки за зајакнување на населбите и „отворање пат“ за анексија.
Инаку, Јудеја и Самарија е израелската терминологија за Западниот Брег, најголемата палестинска територија на западниот брег од реката Јордан, каде живеат приближно 3 милиони етнички Палестинци.
Оваа заедничка изјава означува ново, поостро ниво на реторика од официјален Тел Авив, во период кога масовната глад во Појасот Газа ги поттикнува западните држави да повикаат на признавање на палестинската држава.
Анексијата на Западниот Брег се смета како „црвена линија“ за голем дел од странските сојузници на Израел, бидејќи ваков чекор би ја уништил секоја надеж за решение со две држави во регионот.
Тензиите растат, бидејќи израелски функционери јавно повикуваат на засилено создавање нови еврејски населби во Западниот Брег, што често значи присилно отстранување на палестинските заедници од нивните домови.
Досега околу 500.000 Израелци се населиле во Западниот Брег, најчесто во населби кои меѓународното право ги смета за нелегални. Тие често се обезбедени со сопствено обезбедување, а судирите меѓу доселениците и локалното палестинско население неретко ескалираат во насилство.
Ширењето на ваквите населби е остро осудено ширум светот, но израелски политичари од екстремната десница, како министерот за национална безбедност Итамар Бен-Гвир и министерот за финансии Безалел Смотрич, јавно ги поддржуваат напорите за протерување на Палестинците од регионот.
Овие двајца министри се соочуваат со замрзнати средства, забрана за патување и други санкции во држави како Канада, Австралија, Холандија, Нов Зеланд и Норвешка поради, како што се наведува, „повторено поттикнување насилство врз палестинските цивили“.
Во вторникот, Смотрич отиде уште подалеку и изјави дека целта за основање нови израелски населби во воената зона Газа е „поблиску од кога било“.
Последната заедничка изјава на Левин и Кац сигнализира зацврстување на движењето за анексија во тешко обединетата коалиција на Нетанјаху, иако не нудат конкретни детали зошто овој момент се смета за толку решавачки.
Ова чувство на итност можеби е засилено од најавите на Велика Британија, Франција, Канада, Португалија и Сан Марино дека во септември, на седница на Обединетите Нации, ќе го признаат правото на палестинска државност. Некои од овие земји велат дека доколку се случи прекин на огнот, можна е ревизија на таа одлука.
Покрај функцијата министер за правда, Левин неодамна беше назначен и за привремен министер за внатрешни работи, труд и верски прашања, заменувајќи членови на ултраортодоксната партија Шас, кои поднесоа оставки поради новите обврзувачки правила за воена служба. Две други испразнети места беа доделени на министерот за туризам Хаим Кац.
Левин истовремено ја извршува и функцијата заменик-премиер, која е претежно церемонијална.
© Vecer.mk, правата за текстот се на редакцијата
