Армијата, полицијата и разузнавачките служби започнале антитерористичка операција во Џенин на 21-ви јануари, која властите ја опишаа како „голема и значајна воена операција“.
Израелската војска соопшти дека во операцијата биле убиени неколку милитанти, а неколку осомничени по кои се трага биле приведени.
Џенин е локација на густо населен бегалски камп населен со Палестинци кои беа протерани во војната во 1948 година со која беше основана државата Израел. Бегалскиот камп со децении беше центар на воена активност и цел на повеќекратни напади на израелските безбедносни сили.
Израелските сили, поддржани од хеликоптери и оклопни булдожери, го започнаа нападот врз населбата на 21-ви јануари, два дена по стапувањето на сила на прекинот на огнот меѓу Израел и милитантната група Хамас.
Израел смета дека Западниот Брег е само дел од војната на повеќе фронтови со проиранските групи формирани долж неговите граници, од Газа до Либан и Јемен, и веднаш го насочи своето внимание кон оваа област по прекинот на борбите во Газа.
Агенцијата на Обединетите нации за палестински бегалци објави дека речиси сите 20.000 жители на кампот Џенин се раселени во последните два месеци.
Хамас минатата недела повика на „ескалација на отпорот“ против Израел по уривањето на зградите во Џенин.
Палестинските власти имаат делумна контрола над Западниот Брег, каде живеат околу три милиони Палестинци и е воено контролиран од Израел.
Од почетокот на операцијата, израелските сили се вклучија во вооружени битки со милитантите. Министерот за одбрана Израел Кац рече дека безбедносните сили ќе останат таму додека операцијата не заврши, без да каже кога тоа ќе биде.
Најмалку 25 Палестинци се убиени од почетокот на воената операција во Џенин, меѓу кои девет членови на вооружени групи, еден 73-годишен маж и едно двегодишно девојче. Израелската војска тврди дека убила најмалку 35 милитанти и уапсила повеќе од 100 лица од потерници.
Палестинската државна новинска агенција исто така објави дека израелските сили минатата недела убиле 27-годишен маж за време на рација во бегалски камп во близина на Хеброн.
© Vecer.mk, правата за текстот се на редакцијата
