Неговите изјави дојдоа еден ден откако САД воведоа нова рунда санкции насочени кон иранската нафтена индустрија, главниот извор на приходи на Иран, пренесе Ал Џезира.
„Позицијата на Иран за нуклеарните преговори е јасна и нема да преговараме под притисок и санкции“, рече Арагчи за време на вчерашната телевизиска прес-конференција со рускиот министер за надворешни работи Сергеј Лавров во Техеран.
„Нема можност за директни преговори со САД додека на овој начин се врши максимален притисок.
По враќањето во Белата куќа минатиот месец, Трамп ја обнови својата кампања за „максимален притисок“ врз Иран, која вклучува напори да се намали извозот на иранска нафта на нула, враќајќи ја цврстата политика кон Иран што беше во сила за време на неговиот прв мандат.
Претходно овој месец, врховниот лидер на Иран, ајатолахот Али Хамнеи, исто така рече дека преговорите со Соединетите Држави се „немудри, неразумни и нечесни“. Сепак, тој не ја обнови забраната за директни преговори со Вашингтон што беше во сила за време на првата администрација на Трамп.
Во 2018 година, за време на неговиот прв мандат, Трамп ги повлече Соединетите држави од историскиот нуклеарен договор на Иран од 2015 година со шест светски сили, кој постави ограничувања на иранската нуклеарна програма во замена за олеснување на санкциите.
Оттогаш Иран прекрши некои од границите на тој договор, а напорите за обновување на договорот не успеаја под администрацијата на поранешниот американски претседател Џо Бајден.
Во понеделникот, Иран одржа нова рунда разговори со Германија, Франција и Велика Британија за својата нуклеарна програма, откако го обнови ангажманот со трите земји, познати како Е3, кон крајот на минатата година.
Арагчи рече дека го информирал Лавров за последните преговори. „Во однос на нуклеарното прашање, ќе ја продолжиме соработката и координацијата со нашите пријатели во Русија и Кина“, додаде тој.
Рускиот министер за надворешни работи рече дека е сигурен оти дипломатските мерки сè уште остануваат на маса кога станува збор за решавање на прашањето за иранската нуклеарна програма, објавија иранските државни медиуми.
Со оглед на тоа што Русија исто така се соочува со санкции поради војната во Украина, Москва и Техеран ги интензивираа своите односи во последните години. Двете земји инвестираа во Сирија и претрпеа неуспех во декември со смената на претседателот Башар ал Асад, долгогодишен сојузник.
Арагчи рече дека позициите на Иран и Русија за Сирија се „многу блиски“. „Иран сака мир, стабилност, зачувување на територијалниот интегритет и единство и напредок за Сирија врз основа на волјата на народот“, рече тој.
Лавров, пак, рече дека сакаат ситуацијата да се смири. „Ќе направиме сѐ што можеме за да се погрижиме ситуацијата да се смири и да не претставува закана ниту за сирискиот народ, ниту за луѓето од соседните земји.“
Во Техеран, новинарот на Ал Џезира, Тохид Асади, рече дека министрите за надворешни работи се обидуваат да претстават „слика на координиран, кохерентен и конзистентен став“ за регионалните и билатералните прашања. Беше истакната и неопходноста од проширување на врските на економски и политички план, како и преземање мерки во однос на санкциите“, рече тој.
© Vecer.mk, правата за текстот се на редакцијата
