По повеќечасовен застој, работата во Претставничкиот дом на Соединетите Американски Држави беше обновена доцна синоќа, додека републиканските лидери вложуваа дополнителни напори за да осигурат поддршка за спорниот предлог-закон за даночни и буџетски кратења, поднесен од администрацијата на Доналд Трамп.
Целта е законот да биде изгласан до четврти јули, по примерот на Сенатот кој го одобри претходниот ден. И покрај тоа што беше организирано брзо процедурално гласање, салата на Претставничкиот дом остана празна со часови.
Членовите на Републиканската партија беа повикани на состаноци во Белата куќа со претседателот и на консултации со претседателот на Домот, Мајк Џонсон. Главната цел беше да се надминат разликите во ставовите – умерените пратеници се противат на намалувањето на средствата за програмата Медикејд, додека конзервативното крило изразува загриженост за почитувањето на фискалната дисциплина.
Републиканците, кои имаат тесно мнозинство од 220 против 212 гласови, се потпираат на внатрешна координација и поддршка од Доналд Трамп, со цел да го донесат предлог-законот во Домот, додека демократите остануваат обединети во својата опозиција.
© Vecer.mk, правата за текстот се на редакцијата
