Словачка се надева дека следната година ќе потпише договор со американската компанија „Вестингхаус“ за водење на конзорциум за изградба на нова нуклеарна централа, изјави премиерот Роберт Фицо по средбата со американскиот државен секретар Марко Рубио во Братислава.
Тој наведе и дека Словачка е заинтересирана за купување на уште четири авиони ловци Ф-16 од САД, за да има вкупно 18 авиони.
Фицо истакна дека има информации оти е поправен нафтоводот „Дружба“, по уништувањето во источна Украина, преку кој се испорачува нафта за Словачка и Унгарија. Според него испораките на нафта за Унгарија и Словачка станале дел од политичка уцена.
- Тоа што денес се случува околу нафтата го доживувам како политичка уцена кон Унгарија, поради бескомпромисниот став на Унгарија за членството на Украина во ЕУ - посочи Фицо.
Словачка, исто така, добива руска нафта преку „Дружба“, но испораката овој месец беше прекината поради уништувањето на дел од нафтоводот во источна Украина. Братислава очекува да биде обновена испораката во наредните денови.
© Vecer.mk, правата за текстот се на редакцијата
