Италијанската премиерка Џорџија Мелони и францускиот претседател Емануел Макрон се сретнаа во вторник во Рим, каде што одржаа повеќечасовен разговор во рамките на билатерална средба, по што следеше вечера со нивните делегации.
Како што објави РАИ, Макрон се вратил во Париз по состанокот без планирани обраќања до печатот.
Според агенцијата Анса, фокусот на разговорите биле несогласувањата околу клучните политички прашања, со посебен акцент на ситуацијата во Украина.
Француски извори за Анса изјавија дека „важно е Мелони да присуствува на сите состаноци“, потсетувајќи на нејзиното претходно отсуство од состанокот на европските лидери со американскиот претседател Доналд Трамп за време на самитот во Тирана.
Истите извори од Елисејската палата изјавија дека „форматите (на состанокот) може да варираат“, но дека разликите меѓу европските партнери мора да се решат за да се постигне „најголемо можно влијание според околностите“.
Според достапните информации, Макрон инсистирал на оваа средба за да се обиде да ги надмине недоразбирањата не само поврзани со Украина, туку и со миграциската политика, правото на абортус и трговските спорови со САД.
Додека Мелони, близок помошник на американскиот претседател, ја нагласила потребата од флексибилност и компромис со цел да се укинат царините, Макрон се залагал за строги контрамерки од Европската комисија.
Сепак, на социјалните мрежи најголемо внимание привлекоа нивните фотографии што беа направени за време на нивната средба, на кои изгледаа доста интимно, а дури беше снимено и дека во еден момент ѝ шепнал на уво.
Мелони, сумирајќи ги разговорите, изјави дека состанокот бил „многу корисен за зајакнување на дијалогот и координацијата меѓу Италија и Франција во услови на растечки заеднички предизвици“.
- Утврдивме дека се согласуваме за европската агенда за конкурентност, поедноставување на регулативите, прашањето за јавните и приватните инвестиции, енергетската транзиција, обновливите извори на енергија, како и за прашањето за нуклеарната енергија и вселената. Исто така, ја повторивме нашата силна поддршка за Украина за постигнување праведно и трајно решение, истовремено промовирајќи го зајакнувањето на европската одбрана, изјави Мелони преку социјалните мрежи.
Дискусиите вклучуваа и безбедносни теми, од ситуацијата на Блискиот Исток и Либија, до трансатлантските односи и економските предизвици со кои се соочува Европската Унија.
© Vecer.mk, правата за текстот се на редакцијата
