Американскиот претседател Доналд Трамп објави на социјалните мрежи изменета фотографија од мапа на Соединетите Американски Држави на која се прикажани Канада, Гренланд, Венецуела и Куба како дел од американска територија, објави канадската CBC.
Станува збор за фотографија очигледно изменета од вештачка интелигенција. Оригиналната фотографија е направена во август, за време на посетата на лидерите на НАТО на Белата куќа, кога Трамп во Овалната соба го посетија, меѓу другите, британскиот премиер Кир Стармер и францускиот претседател Емануел Макрон, наведува CBC.
Оригиналната фотографија прикажува стандардна мапа на Соединетите Американски Држави, без територијални промени. Во верзијата што Трамп сега ја објави, мапата е дигитално изменета за да ги вклучи Канада, Гренланд, Венецуела и Куба како дел од САД.
Што вели Трамп за Канада, Гренланд, Куба и Венецуела?
Потсетуваме дека Трамп неодамна повторно ја интензивираше својата реторика за територијалните прашања на западната хемисфера, вклучувајќи ги Гренланд, Венецуела, Канада и Куба.
Од почетокот на јануари 2026 година, по воената операција во Венецуела во која американските сили го уапсија претседателот Николас Мадуро, администрацијата на Трамп нагласи поширока стратегија за зајакнување на влијанието на САД во регионот.
За време на таа акција, Трамп изјави дека САД „ќе ја водат земјата сè додека не се обезбеди безбедна транзиција на власта“.
Инсистира на преземање на Гренланд
Во исто време, Трамп не се откажува од својата долгогодишна идеја дека САД треба да добијат контрола врз Гренланд, автономна територија на Данска, тврдејќи дека тоа е „неопходно за националната безбедност“ и дека САД „мора да ја имаат“. Лидерите на Данска и Гренланд остро се спротивставија на плановите, нагласувајќи дека одлуките за иднината на Гренланд се единствено на Гренландците и Данците.
Дополнително, реториката на Трамп кон Куба вклучува повици до Хавана да „склучи договор“ со САД „пред да биде предоцна“.
„Канада има повеќе смисла како 51-ва држава на САД“
Што се однесува до Канада, Трамп во последните месеци постојано користеше провокативна реторика, тврдејќи дека Канада е „целосно зависна“ од САД од економски и безбедносни причини и дека, како што порано велеше, „би имало повеќе смисла како 51-ва американска држава“.
Ваквите изјави редовно беа отфрлани во Отава, каде што беа сметани за лекомислени и неприфатливи, но тие дополнително ги влошија односите меѓу двете земји, според канадските и американските медиуми.
© Vecer.mk, правата за текстот се на редакцијата
