Италијанската премиерка Џорџа Мелони денес изјави дека не се согласува со проценката на германскиот канцелар Фридрих Мерц за влијанието на културата на MAGA во Европа.
Мерц на Минхенската безбедносна конференција во петокот изјави дека „културната војна на движењето MAGA не е наша“. На прашањето на италијанскиот весник „Кориере дела Сера“ дали се согласува со критиките на Мерц, Мелони одговори: „Не“.
„Ова се политички проценки, секој лидер ги дава како што смета за соодветно, но ова не е прашање што спаѓа во надлежност на Европската Унија“, додаде таа.
Терминот „културна војна на MAGA“ се однесува на идеолошките и социјалните конфликти поврзани со движењето „Да ја направиме Америка повторно голема“. Тоа е политичка стратегија што ги мобилизира гласачите преку дебати за идентитетот, вредностите и општествените норми, вклучувајќи теми како што се имиграцијата, правата на малцинствата, слободата на говорот, улогата на религијата и односите со медиумите.
Мелони наскоро ќе објави книга во Соединетите Американски Држави насловена како „Визијата на Џорџија“, со предговор од американскиот потпретседател Џ.Д. Венс и цитат од Доналд Трамп на корицата.
Разликите меѓу Рим и Берлин се особено забележливи со оглед на тоа што двајцата лидери одржаа заеднички самит на крајот на јануари, претставен како обид за зајакнување на европските приоритети, вклучително и односите со Вашингтон, во време кога нема силна француско-германска оска.
На прашањето дали се согласува со критиките на Мерц за Америка на Трамп, Мелони одговори: „Јасно е дека сме во многу сложена фаза на меѓународните односи, исто така сме во посебна фаза на односите меѓу Европа и Соединетите Американски Држави“.
„И мислам дека Мерц е во право кога вели дека Европа мора да се фокусира на себе и да направи повеќе, на пример во областа на безбедноста, почнувајќи од европскиот столб на НАТО. Се согласувам со тоа“, рече таа.
© Vecer.mk, правата за текстот се на редакцијата
