Фосилизираните фрагменти од коски пронајдени во пештера во Шпанија припаѓаат на најстарото познато човечко лице во Западна Европа, објавија шпанските истражувачи.
Фосилизираните остатоци пронајдени во пештерата Сима дел Елефанте во близина на Атапуерка во провинцијата Бургос го сочинуваат левиот образ и горната вилица на возрасен поединец од одамна исчезнат човечки вид кој живеел на Пиринејскиот Полуостров пред околу 1,1 до 1,4 милиони години, пренесува лондонски Гардијан.
Откритието сугерира дека најмалку две форми на рани луѓе го окупирале регионот во раниот плеистоцен, кога пештерите во кои живееле се наоѓале во огромни шуми, богати со реки, потоци и диви животни.
„Ова дело воведува нов актер во приказната за човековата еволуција во Европа“, рече д-р Роза Хугет од Универзитетот Ровира и Вирџили во јужна Каталонија, која помогна да се открие фосилот. Раните луѓе стигнале до Евроазија од Африка пред најмалку 1,8 милиони години, што е потврдено со пет черепи кои датираат од тој период, пронајдени во Дманиси, Грузија.
Черепите му се припишуваат на хомо еректус, првиот ран човечки вид кој го напуштил африканскиот континент.
© Vecer.mk, правата за текстот се на редакцијата
