Актуелниот претседател на Соединетите Американски Држави, Доналд Трамп, доби ненадејни и остри критики од неговиот поранешен соработник Илон Маск, во врска со сеопфатната даночна реформа што ја предложи и која неодамна беше усвоена во Претставничкиот дом.
Маск, кој првично го поддржуваше законот што Трамп го опишува како „одличен и прекрасен“, целосно го промени својот став откако ја напушти Белата куќа и сега го нарекува „одвратна гнасотија“.
– Законот може да биде или убав или одличен. Не може да биде и двете – рече Маск.
Четири причини за пресврт
Иако јавно тврдеше дека се спротивставува на законот поради зголемувањето на јавниот долг, американскиот портал „Аксиос“ открива четири клучни, во суштина лични причини зошто Маск се предомислил.
Првата причина се однесува на укинувањето на субвенциите за купување електрични автомобили, што директно ќе влијае на продажбата на возила од компанијата Тесла, која е во сопственост на Маск.
Втората причина се однесува и на неговите деловни интереси – и покрај очекувањата, законот не предвидува употреба на сателитите „Старлинк“ за контрола на воздушниот сообраќај.
Третиот мотив е од лична природа. Маск сакаше да остане вработен во Белата куќа откако ќе истече законскиот рок од 130 дена за статус на „специјален владин службеник“. Сепак, претседателската администрација јасно му кажа дека тоа не е можно.
Четвртата причина е исто така лична и е поврзана со одлуката на Доналд Трамп да ја повлече номинацијата на Џаред Исакман, близок пријател и соработник на Маск, за позицијата администратор на НАСА.
Одлуката за повлекување на кандидатурата ја донесе Серхио Гор, директор на Канцеларијата на претседателскиот персонал, кој, според „Аксиос“, често бил во конфликт со Маск. Сепак, таа одлука беше поништена кога беше откриено дека Исакман во минатото донирал на кандидати на Демократската партија.
Тие остануваат сојузници и покрај конфликтите
И покрај острите јавни критики, „Аксиос“ објавува дека Трамп и Маск продолжуваат да одржуваат блиски односи, повикувајќи се на извори од Белата куќа кои тврдат дека двајцата „остануваат пријатели и сојузници“.
© Vecer.mk, правата за текстот се на редакцијата
