Новите прописи во Холандија предвидуваат дека од 1 јануари ќе биде забрането чувањето на одредени раси мачки, меѓу кои и безвлакнестите мачки, поради здравствени ризици.
Мачките што се родени и чипирани пред 1 јануари ќе можат да останат во домаќинствата, но нема да можат да учествуваат на изложби или во програми за одгледување.
Од 1 јануари ќе бидат забранети и аналогните броила, кои ќе мора да се заменат со дигитални.
Аналогните броила за потрошувачка на електрична енергија ќе мора да се заменат до 2026 година со дигитални или паметни броила, способни да го следат производството и испораката на енергија од соларни панели, а големите потрошувачи на вода ќе се соочат со повисоки даноци со цел да се поттикне штедење на енергија.
Минималната плата за вработените постари од 21 година од 1 јануари ќе изнесува 14,71 евро на час, а социјалните давања, вклучително и пензиите за самохрани корисници, ќе се зголемат од 1.527 на 1.558 евра месечно.
Ќе биде проширено правото на субвенции за кирија, кое претходно беше ограничено на социјално домување со максимални кирии од 900 или 477 евра за млади станари, а станарите ќе имаат право на целосни субвенции почнувајќи од 21 година, наместо од 23.
Данокот на пренос на сопственост за недвижности што не се прва сопственост ќе се намали на осум проценти од сегашните 10,4 проценти, а купувачите на прв дом помлади од 34 години нема да плаќаат данок на пренос на сопственост.
Прописите за електронските цигари ќе бидат заострени, со ограничување на продажбата само во специјализирани продавници.
Според новите прописи, работодавачите може да се соочат со казни поради погрешна класификација на вработените како фриленсери, субвенциите за плати за вработување постари работници ќе бидат укинати, а одбивката за самовработување ќе се намали од 2.470 на 1.200 евра. Готовински плаќања над 2.999 евра ќе бидат забранети во претпријатијата.
Бејбиситерките мора веднаш да ги пријават сериозните инциденти во кои се вклучени деца до Јавната здравствена служба (GGD), а според новите прописи, за рекреативен риболов на море ќе биде потребна регистрација на податоци во апликацијата Rec-Fishing за целата Европска унија, почнувајќи од 10 јануари.
© Vecer.mk, правата за текстот се на редакцијата
