Сојузникот на Трамп, Чарли Кирк, беше застрелан на настан во Јута, вели извор запознаен со ова прашање, јавува CNN.
Американските сенатори од Јута изјавија дека го следат пукањето врз сојузникот на Трамп, Чарли Кирк.
„Внимателно ја следам ситуацијата на Универзитетот во долината Јута. Ве молам, придружете ми се во молитвата за Чарли Кирк и студентите собрани таму“, објави сенаторот од Републиканската партија, Мајк Ли, на X кратко откако се појави веста за пукањето.
Сенаторот од Републиканската партија, Џон Кертис, напиша на X: „Моето срце е со Чарли, присутните и нивните семејства. Се молиме за неговата безбедност и благосостојбата на сите погодени.“
„Мојот тим и јас ќе продолжиме да собираме повеќе информации штом ќе станат достапни и внимателно ја следиме ситуацијата. Благодарен сум за брзата реакција на органите за спроведување на законот и првите реагирачи кои работат на обезбедување на кампусот“, продолжи тој.
Претседателот Доналд Трамп повикува на молитви за конзервативниот активист Чарли Кирк, за кого потврди дека е застрелан.
„Сите мора да се молиме за Чарли Кирк, кој е застрелан“, напиша Трамп на Truth Social.
„Одличен човек од горе до долу. БОГ ДА ГО БЛАГОСЛОВИ!“, продолжи претседателот.
Трамп претходно го пофали Кирк како клучен за неговите добивки меѓу младите гласачи на минатогодишните претседателски избори.
Чарли Кирк, влијателен десничарски активист близок до американскиот претседател Доналд Трамп и извршен директор на Turning Point USA (TPUSA), беше ранет за време на настан на Универзитетот Јута Вали.
Видеата што кружат на социјалните мрежи го покажуваат моментот кога бил застрелан во вратот додека зборувал под шатор во дворот на универзитетот. Во исто време, студентите бегале во паника од звуците на пукотници. Кирк таму настапил како дел од турнејата American Comeback Tour, организирана од локалниот огранок на TPUSA.
Универзитетската полиција потврди дека биле испукани истрели, а ФБИ соопшти дека агентите брзаат на местото на настанот и целосно ја поддржуваат истрагата.
„Куршумот бил насочил директно кон Кирк“
Скот Тротер, портпарол на Универзитетот Јута Вали, изјави за BBC дека Кирк е ранет и дека напаѓачот не е уапсен, но во меѓувреме, видеа од наводното апсење на напаѓачот се појавија на социјалните мрежи и сè уште не се потврдени.
Тротер, исто така, рече дека околу 12:25 часот по локално време, „се слушнал истрел во дворот на универзитетот, во близина на студентската кафетерија, додека Чарли Кирк го започнувал својот настап“. Тој додаде дека кампусот е затворен до крајот на денот.
Американскиот конгресмен Џејсон Чафец, кој бил на настанот со својата ќерка, за Фокс њуз изјави дека насилството било „шокантно“. „Сите се фрлиле на подот и избегале“, рече Чафец. „Куршумот паднал право во него“. Тој додаде дека разговарал со Кирк непосредно пред почетокот на состанокот.
© Vecer.mk, правата за текстот се на редакцијата
