Францускиот министер за надворешни работи Жан-Ноел Баро објави дека ЕУ воведува санкции врз „главните израелски организации одговорни за поддршка на екстремистичката и насилна колонизација на Западниот Брег, како и нивните лидери“.
„Овие најсериозни и неподносливи акти мора веднаш да престанат“, напиша Баро на социјалната мрежа X.
Санкции и против лидерите на Хамас
Баро додаде дека ЕУ усвоила санкции и против „главните лидери на Хамас“.
„Нема да дозволиме никој да ја поткопа надежта што Франција ја оживеа во Њујорк минатата година, дека две признати и почитувани држави можат да живеат една до друга во мир и безбедност“, рече тој.
Високиот претставник на ЕУ за надворешни работи, Каја Калас, исто така, ја потврди одлуката.
„Министрите за надворешни работи на ЕУ дадоа зелено светло за санкционирање на израелските доселеници за насилство врз Палестинците. Крајно време е да преминеме од зборови на дела. Екстремизмот и насилството имаат последици“, напиша Калас на X.
Повеќе од илјада Палестинци убиени на Западниот Брег
Одлуката е донесена на состанок на Советот за надворешни работи на ЕУ во Брисел.
Насилството на окупираниот Западен Брег ескалираше од почетокот на израелската војна во Газа во октомври 2023 година. Палестинските власти велат дека оттогаш имало убиства, апсења, уривање куќи и проширување на населбите.
Според палестинските бројки, најмалку 1.155 Палестинци се убиени на Западниот Брег од тогаш, околу 11.750 се повредени, а речиси 22.000 се уапсени.
© Vecer.mk, правата за текстот се на редакцијата
