ДУБАИ, Обединети Арапски Емирати (АП) — Членовите на екипажот на товарниот брод „Magic Seas“ под либериско знаме беа принудени да го напуштат бродот во неделата вечер, откако по низа напади во Црвеното Море бродот почна да прима вода. Овој инцидент е првиот посериозен напад во оваа важна трговска рута по повеќемесечната кампања на јеменските бунтовници Хути.
Се претпоставува дека нападот врз грчкиот товарен брод Magic Seas го извршиле токму Хутите, особено поради тоа што, според безбедносна компанија, пловилото било погодено од експлозивно беспилотно пловило, по претходен напад со лесно оружје и рачни ракети. Медиумите на бунтовниците известија за нападот, но не ја презедоа одговорноста веднаш. Нивното признавање на вакви акции често доцни со часови или дена.
Обновувањето на нападите од страна на Хутите врз бродови може повторно да доведе до вмешување на САД и западните сили во овој регион — особено ако се има предвид дека и претходно беа спроведени воздушни напади врз бунтовниците.
Кратко пред полноќ по јеменско време, израелската армија објави предупредување за три пристаништа под контрола на Хутите во Јемен и најави воздушни напади врз Ходајда, Рас Иса, Салиф и електраната Рас ал-Кхатиб.
Нападот доаѓа во чувствителен период
Овој напад се случува во особено чувствителен момент за Блискиот Исток, додека надежите за прекин на огнот меѓу Израел и Хамас се уште висят, а Иран размислува дали повторно да започне преговори за својата нуклеарна програма по американските воздушни напади на нивните најчувствителни атомски локации и поради војната меѓу Израел и Исламската Република.
„Овој напад најверојатно претставува порака дека Хутите сѐ уште имаат капацитет и волја да напаѓаат стратешки поморски цели, без разлика на дипломатските движења,“ напиша аналитичарот Мохамед ал Баш од фирмата Basha Report.
Британскиот центар за поморска трговија првично соопшти дека вооружена обезбедувачка екипа на непознат брод возвратила на почетниот напад и дека „ситуацијата е сѐ уште во тек“. Инцидентот се случил околу 60 милји југозападно од Ходајда, град под контрола на Хутите.
„Се работи на истражување на настанот,“ наведоа властите. Потоа беше пријавено дека бродот се запалил откако бил погоден од непознати проектили.
Можно ескалирање на насилството
Приватната компанија за поморска безбедност Ambrey информираше дека трговскиот брод бил „нападнат од осум брзи чамци додека се движел кон север низ Црвеното Море“.
Ambrey дополнително соопшти дека врз бродот биле извршени и напади од самоубиствени дрон-чамци со експлозив, што може да биде сериозна ескалација. Два чамци-дронови го погодиле бродот, додека другите два биле уништени од обезбедувањето.
Според британскиот центар, бродот почнал да прима вода и екипажот го напуштил бродот.
Американската морнарица од Блискиот Исток изјави дека е запознаена со инцидентот, но не откри детали.
Министерот за информации на јеменската влада во егзил, Моамар ал Еријани, го идентификуваше нападнатиот брод како 'Magic Seas' и директно ги обвини бунтовниците од Хути. Бродот имал најавено дека превезува вооружено обезбедување во областа каде што е нападнат и се движел кон север.
„Овој напад уште еднаш докажува дека хутите се само алатка на иранската стратегија за дестабилизација на регионот, во време кога Техеран активно ги снабдува со оружје, ракети, дронови и морски мини,“ напиша ал Еријани на социјалната мрежа X.
Сопствениците на бродот Magic Seas досега не дадоа коментар за нападот.
Нападите на Хутите резултат на војната меѓу Израел и Хамас
Бунтовниците Хути во последните месеци изведоа низа напади со ракети и дронови врз комерцијални и воени бродови, тврдејќи дека е тоа одговор на офанзивата на Израел против Хамас во Газа.
Телевизијата на групата, Ал Масира, потврди дека нападот се случил, но не објави детали, додека на етерот настапувал лидерот Абдул Малик ал-Хути. Ambrey соопшти дека целниот брод одговарал на типичниот профил на цели за напад од страна на Хутите.
Меѓу ноември 2023 и јануари 2025 година, Хутите нападнале над 100 трговски бродови со ракети и дронови, при што биле потопени два брода, а загинале четворица морнари. Ова значително ја намали трговијата низ оваа важна морска рута, по која годишно се движат стоки во вредност од над 1 трилион долари.
Хутите сами прогласија затишје, но откако САД лансираа сериозна операција против нив во март, нападите се обновија. Во последните недели бројот на транзит низ Црвеното Море повторно порасна, иако и понатаму е помал од вообичаено.
Во меѓувреме, пошироката, веќе децениска војна во Јемен меѓу Хутите и владата во егзил, поддржана од Саудиска Арабија, останува во ќорсокак. Јеменската крајбрежна стража, лојална на владата, во минатото и самата влегуваше во вооружени судири со бродови во Црвеното Море.
Пиратите од Сомалија остануваат активни во регионот, иако обично нивна цел е пленување на бродови заради кражба или откуп на екипажот. Но, ниту јеменската крајбрежна стража, ниту пиратите досега немаат користено дрон-чамци во своите напади.
© Vecer.mk, правата за текстот се на редакцијата
