Европскиот контрапредлог за мир предвидува американски безбедносни гаранции како оние што произлегуваат од Член 5 од договорот за НАТО, кој го смета нападот врз една членка за напад врз сите, објави агенцијата Ројтерс, која имаше пристап до текстот.
Во европскиот контрапредлог, исто така, се наведува дека НАТО се согласува трајно да не ги задржува своите сили во Украина во мирно време.
Во мирно време, украинската армија би била ограничена на максимум 800.000 членови. Американскиот план ја постави горната граница на 600.000 војници.
Европа, исто така, бара Украина да биде финансиски обесштетена, вклучително и преку руски средства што ќе останат замрзнати додека Русија не ја надомести штетата на Украина.
Европскиот предлог, исто така, содржи одредба дека Украина нема да ги врати своите „окупирани суверени територии“ воено, туку ќе води преговори за размена на територии, а почетната точка ќе бидат линиите на контакт.
Европскиот предлог предвидува одржување избори во Украина што е можно поскоро по потпишувањето на мировниот договор.
Извор на Ројтерс, запознаен со напредокот на преговорите, изјави дека во Женева се во тек големи разговори меѓу делегациите на САД и Украина за нацрт-план презентиран од Вашингтон за прекин на војната во Украина.
Што содржи планот на Трамп?
Освен територијалните отстапки на Украина, планот на Трамп за Украина наведува дека во случај на понатамошен руски напредок, ќе следи „одлучувачки координиран воен одговор“. Не е наведено каква улога ќе играат САД во таа реакција.
Планот има и економски елементи: дел од замрзнатите руски средства ќе се користат за обнова на Украина, санкциите против Русија ќе бидат укинати, САД и Русија ќе соработуваат на долг рок во области како што се вештачката интелигенција и експлоатацијата на минерали, а Русија ќе се врати во Г8.
Сите страни ќе добијат амнестија за дејствија за време на војната, што значи дека руските функционери и војници нема да можат да бидат гонети за воени злосторства.
Планот, исто така, предвидува дека Украина ќе организира избори во рок од 100 дена од склучувањето на договорот. Во септември, Зеленски истакна дека сака избори по воспоставувањето на прекинот на огнот.
Европскиот план има 24 точки
Прекин на огнот
1. Крај на војната и договори за да се обезбеди дека војната нема да се повтори, со цел да се воспостави трајна основа за траен мир и безбедност.
2. Двете страни во конфликтот се обврзуваат на целосно безусловно примирје во воздух, на копно и на море.
3. Двете страни веднаш започнуваат преговори за техничка имплементација на мониторингот на прекинот на огнот со учество на САД и европските земји.
4. Се воведува меѓународен мониторинг на прекинот на огнот предводен од САД од страна на партнерот на Украина. Мониторингот ќе биде претежно од далечина со користење на сателити, беспилотни летала и други технолошки алатки со флексибилна копнена компонента за истражување на наводни прекршувања.
5. Ќе се воспостави механизам преку кој страните ќе можат да поднесуваат извештаи за прекршувања на прекинот на огнот, да истражуваат прекршувања на прекинот на огнот и да разговараат за корективни мерки.
Хуманитарни прашања и мерки за градење доверба
6. Русија безусловно ги враќа сите депортирани и нелегално раселени украински деца. Процесот ќе биде поддржан од меѓународни партнери.
7. Страните во конфликтот разменуваат сите воени заробеници („сите за сите“). Русија ги ослободува сите цивилни притвореници.
8. По обезбедувањето на одржливоста на прекинот на огнот, страните во конфликтот преземаат мерки за хуманитарна помош, вклучително и посети на семејства преку линијата на контакт.
Гаранции за суверенитет и безбедност
9. Суверенитетот на Украина се почитува и потврдува. Украина не е принудена да биде неутрална.
10. Украина добива силни правно обврзувачки безбедносни гаранции, вклучително и од САД (договор сличен на член 5) за спречување на идна агресија.
11. Нема ограничувања наметнати врз украинските одбранбени сили и одбранбената индустрија, вклучително и меѓународната соработка.
12. Државите гаранти ќе бидат ad hoc група од европски земји и земји кои се подготвени да се приклучат на ЕУ. Украина е слободна да одлучува за присуството, вооружувањето и дејствијата на пријателските сили поканети од владата на Украина на нејзина територија.
13. Членството на Украина во НАТО зависи од консензусот во рамките на Алијансата.
14. Украина станува членка на ЕУ.
15. Украина е подготвена да остане ненуклеарна држава.
Територија
16. Територијалните прашања ќе бидат дискутирани и решени по целосно и безусловно примирје.
17. Територијалните преговори започнуваат од сегашната линија на контрола.
18. Откако ќе се договорат територијалните прашања, и Русија и Украина се обврзуваат да не ги менуваат со сила.
19. Украина ја враќа контролата врз нуклеарната централа Запорожје (со вклучување на САД) и браната Каховка. Ќе се воспостави механизам за пренос на контрола.
20. Украина ужива непречен премин низ реката Днепар и контрола врз Кинбурнскиот истмус.
Економија, закрепнување и репарации
21. Украина и нејзините партнери остваруваат економска соработка без ограничувања.
22. Украина ќе биде целосно обновена и финансиски компензирана, вклучително и преку руски суверени средства кои ќе останат замрзнати додека Русија не ја компензира Украина.
23. Санкциите воведени врз Русија од 2014 година може постепено и делумно да се ублажат откако ќе се постигне одржлив мир и да бидат предмет на продолжување во случај на прекршување на мировниот договор (snapback).
Европска безбедносна архитектура
24. Ќе започнат одделни разговори за европската безбедносна архитектура, вклучувајќи ги сите држави на ОБСЕ.
© Vecer.mk, правата за текстот се на редакцијата
