Во силните врнежи и свлечишта во неколку региони на Шри Ланка загинале најмалку десет лица, а 15.000 луѓе морале да ги напуштат своите домови, објавија во вторникот тамошните власти.
Есктремните временски услови во изминатите три дена предизвикале оштетувања на домовите и на земјоделските земјишта ширум земјата.
Во лизгање на почвата во две области загиначе четири лица во понеделникот вечерта. Во Рамбукана, 95 километри источно од главниот град Коломбо, загинале три члена на четиричлено семејство затрупани во свлечиште. Четвртото лице е спасено, а телата на трите члена на семејството се извлечени, соопшти полицијата.
Во централната област Нармала, во свлечиштата загинала 23-годишна жена. Други шест лица загинале во неделата во поплавите и свлечиштата.
Под вода останале хектари земјоделско земјиште. Оштетени се повеќе од 50 куќи, а не можат да се користат неколку главни патни правца во различни делови на земјата.
Во повеќето региони на Шри Ланка обилните врнежи се поради атмосферските нарушувања во Бенгалскиот залив, предупредуваат метеоролозите.
© Vecer.mk, правата за текстот се на редакцијата
