Светската здравствена организација алармира дека секојдневно околу 112 палестински деца завршуваат во болниците во Газа поради неухранетост, што е последица на продолжената блокада и воените дејства во регионот.
Хуманитарната состојба во Газа ги надминува сите катастрофални граници, соопшти генералниот директор на организацијата, Тедрос Гебрејесус.
Од вкупно 36 болници во Појасот Газа, само 17 работат делумно, а ниту една не функционира во северниот дел или во Рафа на крајниот југ – подрачја кои се најтешко погодени од конфликтот.
Гебрејесус истакна дека над 500 лица го загубиле животот при обиди да достават животно важна храна до пунктовите за дистрибуција на помош надвор од системот на Обединетите нации.
Според него, екипите на Светската здравствена организација оваа недела за првпат добиле можност да влезат во Газа од 2 март, и тоа со многу ограничени ресурси, што ги отежнува напорите за помош на населението.
© Vecer.mk, правата за текстот се на редакцијата
