Авганистанскиот државјанин обвинет за пукање во двајца припадници на Националната гарда во близина на Белата куќа претходно соработувал со американските безбедносни служби, вклучително и со Централната разузнавачка агенција (ЦИА), објави „Фокс њуз“, повикувајќи се на разузнавачки извори.
Осомничениот Рахманула Лаканвал (29), кој беше ранет за време на нападот во Вашингтон, влегол во САД кратко време по хаотичното повлекување на американските сили од Авганистан во август 2021 година, за време на администрацијата на претседателот Џо Бајден.
Лаканвал пристигнал во САД како дел од програмата „Операција добредојдени сојузници“, само еден месец откако Талибанците го зазедоа Кабул.
Според разузнавачки извори, Лаканвал со години имал врски со разни структури на американската влада бидејќи, како член на локалните партнерски сили, соработувал со американските трупи во Кандахар, вклучително и со ЦИА.
Остри реакции: „Никогаш не требало да му биде дозволено да влезе во САД“
Поранешниот директор на ЦИА, Џон Ратклиф, изјави за „Фокс њуз“ дека администрацијата на Бајден во 2021 година го оправдала влегувањето на Лаканвал во САД токму поради неговата претходна соработка со американските агенции.
„Тој и многу други никогаш не требаше да добијат дозвола да влезат во земјата“, рече Ратклиф.
Тој додаде:
- Нашите граѓани и припадници на војската заслужуваат многу подобро од последиците од катастрофалните неуспеси на администрацијата на Бајден.
ФБИ истражува: осомничен меѓународен тероризам
Фокс њуз објави дека ФБИ ја презеде истрагата, а повеќе високи разузнавачки извори рекоа дека инцидентот се смета за можен чин на меѓународен тероризам.
Службеници на ФБИ потврдија дека двајца членови на Националната гарда на Западна Вирџинија остануваат во критична состојба.
Трамп: „Дивјачки напад во близина на Белата куќа“
Во обраќањето до нацијата доцна синоќа, претседателот на Соединетите Американски Држави, Доналд Трамп, го опиша нападот како „дивачки чин“ и рече дека еден од гардистите бил „застрелан од блиску во заседа, на само неколку чекори од Белата куќа“.
Трамп потврди дека напаѓачот бил авганистански државјанин и најави темелна проверка на сите лица од Авганистан кои влегле во САД за време на мандатот на Џо Бајден.
© Vecer.mk, правата за текстот се на редакцијата
