Феноменот на социјално повлекување познат како хикикомори, кој порано беше проблем карактеристичен за Јапонија, сè почесто се појавува и во Италија, со пораст на бројот на млади кои со месеци, па дури и со години, остануваат затворени дома без никаков контакт со надворешниот свет освен преку социјалните мрежи, се наведува во извештај што го пренесува Анса.
Во Италија има околу 200.000 вакви случаи, многу повеќе од официјалните процени, стои во извештајот објавен во средата на конференцијата „Книга, хартија и молив“, одржана во Министерството за образование, на која присуствувал министерот Џузепе Валдитара.
Додека официјалните процени говорат за 50 до 60 илјади случаи во земјата, неофицијалните податоци укажуваат на најмалку 200.000.
Причини и размери на проблемот
Хикикомори најмногу ги погодува адолесцентите кои се повлекуваат во себе, често на подолг период, поради длабоки проблеми во односите и лични тешкотии. Причините се бројни: чувство на неадекватност, тешкотии во односите со врсниците, фрустрација и самопонижување. Во Јапонија има околу еден милион вакви случаи.
„Во контакт сме со 5.000 до 10.000 семејства на млади, а нашата процена е 200.000 случаи: проблемот е длабоко вкоренет и во Италија“, предупреди Марко Крепалди, психолог и претседател на националното здружение „Хикикомори Италија“, кое од 2017 година работи на справување со појавата на социјална изолација кај младите низ целата земја.
Вештачката интелигенција и стратегиите за помош
„Зависноста не е само психолошка, туку и емоционална: се соочуваме со емоционална зависност од вештачката интелигенција“, продолжи тој. „Мора да бидеме внимателни поради нездравата врска со неа и да следиме како вештачката интелигенција влегува во училиштата, бидејќи може да го попречи процесот на учење. Накусо, мора да се фокусираме на училиштата.“
Неодамна усвоениот „Нов план за детство и адолесценција“ се занимава со проблемот на социјалната изолација кај децата и адолесцентите, со цел да се истакне овој сè уште недоволно познат феномен и да се развијат конкретни решенија. Целта е подобро да се разберат различните форми на изолација преку насочени истражувања и да се дефинираат алатки и стратегии за следење, спречување и поддршка на лицата кои се засегнати.
© Vecer.mk, правата за текстот се на редакцијата
