Неколку европски земји се подготвени да ги испратат своите војници во Украина за да помогнат во одржувањето на мирот и да реагираат во случај Русија да прекрши потенцијален мировен договор, изјави генералниот секретар на НАТО, Марк Руте, во интервју за германскиот „Билд“.
Одговарајќи на прашања од новинари, Руте нагласи дека деталите за распоредувањето на силите не се дискутираат јавно, но потврди дека неколку земји веќе изразиле подготвеност да ги испратат своите сили.
Коалиција на подготвените
Генералниот секретар на НАТО објасни дека Алијансата во моментов работи на структурирање на таканаречената „Коалиција на подготвените“, што вклучува дефинирање на природата на распоредувањето на копнени, морски и воздушни сили. Сите тие елементи во моментов се координираат, рече тој.
Да потсетиме дека пред пет дена лидерите на земјите учеснички во „Коалицијата на подготвените“ официјално ја изразија својата подготвеност да распоредат сили за поддршка во Украина како дел од безбедносните гаранции по завршувањето на војната.
Потврди од Лондон и Лисабон
Според портпаролот на британскиот премиер Кир Стармер, Обединетото Кралство ја потврди својата подготвеност да распореди сили во Украина по прекинот на непријателствата. Стармер додаде дека планот за повоено распоредување на мировни сили во Украина е веќе подготвен.
Вчера, португалскиот премиер Луис Монтенегро, исто така, изјави дека Португалија не ја исклучува можноста за распоредување трупи во Украина како дел од мировниот контингент, но нагласи дека таков потег би бил можен само по завршувањето на војната.
© Vecer.mk, правата за текстот се на редакцијата
