Израелска авијација го интензивираше бомбардирањето над позиции во Иран, додека американскиот претседател Доналд Трамп излезе со барање за безусловна капитулација на иранската страна. Истовремено, Вашингтон разгледува варијанта Израел да биде вклучен во планираните воздушни удари врз Исламската Република.
Иранскиот народ не знае за предавање, порачува врховниот лидер Али Хаменеи во порака пренесена на државната телевизија. Во последните денови, државните функционери ретко се појавуваат јавно, а комуникацијата со Западот главно ја одржуваат преку дипломатски претставници.
Изјавите на претседателот Трамп се неосновани и непријателски настроени. Не можеме да ги игнорираме таквите пораки и будно ги следиме неговите зборови, бидејќи доколку таа линија се премине, нашиот одговор е неизбежен.
Во текот на ноќта, преку социјалните мрежи, претседателот Трамп уште еднаш повтори закани кон Али Хаменеи, наведувајќи дека САД знаат каде се наоѓа, но дека нема веднаш да посегнат по неговиот живот. Сепак, во американската администрација постојат поделени ставови за евентуална воена интервенција на страната на Израел.
Никој досега не објасни кое би било правното оправдување за напад. Многу блиски соработници на Трамп не се расположени да внесат САД во уште една војна на Блискиот Исток, која повеќето ја сметаат за бесконечна.
Со се’ почести израелски воздушни напади, Техеран го намали интензитетот на сопствените ракетни напади кон Израел. Официјалниот одговор зошто не е даден, но и покрај сето тоа, иранската Револуционерна гарда тврди дека ситуацијата е под контрола.
Моќните и маневрирачки ракети „Фатах“ ги потресоа базите на окупаторите, надминувајќи ја нивната противракетна одбрана и испраќајќи силна порака до противниците.
Тврдењата за големи ирански успеси не можеа да бидат потврдени, бидејќи на новинарите не им е дозволено пристап до нападнатите локации во Израел.
Израелските владини и воени претставници постојано уверуваат дека израелската страна ја води иницијативата, но значителен дел од дипломатските напори се насочени кон лобирање Вашингтон да обезбеди конкретна помош.
Ова е режим кој не се покорува на дипломатски средства и постојано се заканува со нуклеарно оружје. Не можеме да ја доведеме иднината на нацијата во рацете на тие што сакаат уништување на Израел и Америка.
Според американски извори, стратегијата на САД е целосно затворање на конфликтот со два пристапи – преку дипломатија или со сила. Дипломатскиот пристап подразбира нови спогодби со кои би се ограничила иранската нуклеарна програма во замена за олеснување на санкциите. Воената опција подразбира подготовка на воена инфраструктура во регионот, вклучувајќи распоредување на американска морнарица и воздушни сили блиску до местото на конфликтот.
© Vecer.mk, правата за текстот се на редакцијата
