Руска воена победа во Украина би ја чинело Европа двојно повеќе од украинската победа, се наведува во студијата спроведена од Кориско, норвешка приватна консултантска фирма, и Норвешкиот институт за меѓународни односи, објави во саботата „Киев Индепендент“.
Истражувачите ги споредиле резултатите од две воени и економски сценарија во обид да ја пресметаат цената за Европа.
Во едно сценарио, руските сили продолжуваат да напредуваат кон реката Днепар, а Кремљ ја принудува Украина да прифати мировни услови во корист на Москва.
Таквиот исход - делумна победа за Русија - би му дал на Кремљ влијание врз политичката и економската ориентација на Украина, вклучително и членството во ЕУ и НАТО, се наведува во извештајот.
Авторите на студијата предупредуваат дека во тоа сценарио, Украина би можела да изгуби половина од својата територија, да се соочи со долгорочна политичка дестабилизација и да ризикува демократска регресија, па дури и колапс на државата.
Милиони Украинци, помеѓу шест и 11 милиони, би можеле да се преселат во Европа, што би генерирало трошоци од 524 до 952 милијарди евра во текот на четири години, заклучува студијата.
Дополнителните средства за одбрана со цел зајакнување на источното крило на НАТО би ги зголемиле вкупните европски трошоци во првото сценарио на 1,2 до 1,6 трилиони евра.
По договорот за Украина, Русија би можела да ги пренасочи воените ресурси кон Молдавија, балтичките држави или нордискиот регион, се наведува во норвешкиот извештај.
Европските влади би морале брзо да ги изградат своите одбранбени и одвраќачки капацитети во Балтикот и Арктикот, справувајќи се со растечките притисоци од миграцијата и силната политичка поларизација што е веќе видлива во повеќето европски земји.
Во второто сценарио, во случај на победа на Украина, трошоците за Европа би биле значително пониски. Со вистинско ниво на поддршка, Украина би можела да ја врати својата борбена моќ и да почне да ги враќа окупираните територии, како што беше случајот со контраофанзивите во 2022 година, наведуваат истражувачите.
Во ова сценарио, украинскиот моментум на бојното поле би ја принудил Русија на мировни преговори што би ги заштитиле клучните интереси на Киев, објавува „Киев Индепендент“.
Но, за да победи, на Украина би ѝ бил потребен брз прилив на воена опрема.
Ова, според проценката на авторите на студијата, вклучува „од 1.500 до 2.500 борбени тенкови и од 2.000 до 3.000 артилериски системи во текот на една или две години... На Украина ѝ се потребни и до осум милиони беспилотни летала од сите видови, воздушна одбрана и стратешки ракетни системи“.
Со ова оружје, Украина би можела да го запре рускиот напредок, да ги врати стратешки важните области и да ги врати условите за политичка нормализација и економско закрепнување, се наведува во студијата.
Делумна украинска победа би ја забрзала и интеграцијата во ЕУ, би го охрабрила враќањето на бегалците и би ги намалила премиите за инвеститорите.
Проценетите трошоци на Европа за овозможување на таков исход се помеѓу 522 и 838 милијарди евра во текот на четири години, приближно половина од цената на руската победа.
Заплената на замрзнатите руски средства (околу 300 милијарди во белгиските банки) би можела да ги намали европските расходи до 50 проценти.
Во двете сценарија, Европа би го преземала најголемиот дел од поддршката за Украина, бидејќи студијата проценува дека Соединетите Држави постепено ќе ја прекинат својата поддршка за украинската и европската одбрана со текот на времето.
Резултатите од истражувањето беа објавени во време кога притисокот за наоѓање нови средства за Украина е најинтензивен.
Се очекува финансиите на Украина да пресушат кон средината на 2026 година.
Според шемата „заем за репарации“, предводена од претседателката на Европската комисија, Урсула фон дер Лајен, приближно 140 милијарди евра замрзнати резерви на руската централна банка би биле позајмени на Украина.
И покрај одредено противење од некои европски лидери, Европската комисија и мнозинството земји-членки на ЕУ ја поддржуваат шемата за заем за репарации и ќе се обидат да го финализираат договорот на состанокот на Европскиот совет на 18 и 19 декември, потсетува КИ.
© Vecer.mk, правата за текстот се на редакцијата
