Рускиот претседател Владимир Путин денес потврди дека руските трупи ја презеле контролата врз Часов Јар во Донецк во источна Украина.
„Неодамна слушнавме дека е окупирана нова населба, Часов Јар, тоа е доста голема населба. Веќе слушнавме дека тоа не одговара на реалноста. Можам да ви кажам, ве уверувам, дека ова целосно одговара на реалноста“, изјави Путин пред новинарите.
Тој изјави дека и покрај фактот што руското Министерство за одбрана издаде соопштение во четврток дека руските трупи ја презеле контролата врз местото, Часов Јар бил окупиран пред неколку дена.
Путин и белорускиот претседател Александар Лукашенко денес одржуваат неформален состанок на островот Валам во руска Карелија.
Путин и Лукашенко го посетуваат Валам заедно во текот на летото веќе неколку години.
Тие го посетија островот во јули 2019, 2023 и 2024 година.
Украинската војска во четврток го негираше тврдењето на Москва дека руските сили го зазеле градот Часов Јар во регионот Донецк, кој е едно од главните жаришта на конфликтот на источниот фронт.
„Ситуацијата во Часов Јар остана иста како и во последните месеци. Русија едноставно повторно лаже, за да може ова тврдење да циркулира и да предизвика негирања“, изјави Виктор Трегубов, портпарол на украинската група сили „Хортика“, пренесува Киев Индепендент.
Руското Министерство за одбрана во четврток објави дека руските трупи го зазедоа овој град за време на офанзивата во правец на Краматорск и Дружковка.
Часов Јар, кој се наоѓа само неколку километри западно од окупираниот Бахмут, е под руска опсада од април 2024 година.
Градот беше во голема мера уништен.
По падот на Бахмут во мај 2023 година и Авдејевка во февруари 2024 година, руските сили окупираа село по село и се приближија до Часов Јар.
Часов Јар, кој се наоѓа на височините што обезбедуваат природна одбрана, е клучна стратешка точка бидејќи е највисоката точка во областа.
© Vecer.mk, правата за текстот се на редакцијата
