Одлуката за забрана на настанот, кој требаше да се одржи на 28 јуни, дојде откако унгарскиот парламент усвои закон во март, а следниот месец уставните измени што ѝ дозволуваат на владата да забрани јавни собири на ЛГБТК+ заедницата.
Критичарите и правните експерти веруваат дека ова е уште еден чекор кон она што го нарекоа „авторитаризам на автократска влада“. Објаснувајќи ја забраната, полицијата во Будимпешта наведе дека постои можност лице под 18 години да учествува во нелегални активности доколку присуствува на планираната прошетка.
Тие исто така тврдеа дека маршот може да предизвика „пасивни жртви“, кои „поради природата на собирот, иако не сакаат да учествуваат, сепак стануваат сведоци поради јавниот карактер на настанот“.
Организаторите ја нарекоа одлуката на владата „вистински пример за тиранија“ и ја изразија својата решеност да продолжат да го одржуваат настанот и покрај забраната. Овој закон предвидува казни за организаторите и учесниците на настаните на Парадата, како и употреба на софтвер за препознавање лица за идентификација на учесниците.
Законот за заштита на децата во Унгарија забранува „демонстрирање или промовирање“ на хомосексуалност кај лица под 18 години. Полицијата приложи фотографии и видеа од претходните настани на Парадата кон изјавата, наведувајќи ги како доказ дека маршот би можел да ги прекрши новите закони што забрануваат јавно прикажување на хомосексуалност.
Франција, Германија и Шпанија, заедно со најмалку 20 други земји од Европската Унија, минатиот месец ја повикаа Унгарија да го ревидира својот закон со кој се забрануваат ЛГБТК+ настани, изразувајќи загриженост дека тој е во спротивност со основните вредности на човековото достоинство, слободата, еднаквоста и почитувањето на човековите права, како што се дефинирани во договорите на ЕУ.
Организаторите на Будимпештанската парада, која собира десетици илјади луѓе секоја година и годинава ја слави својата 30-годишнина, ветија дека маршот ќе се одржи, и покрај заканите за законски санкции.
Да потсетиме дека во март, унгарскиот парламент донесе закон по забрзана постапка со кој се забрануваат Парадите на гордоста.
Законот, исто така, им дозволува на властите да користат софтвер за идентификување на учесници во потенцијални собири на ЛГБТК заедницата.
Беше усвоен со 136 гласови од пратениците „за“ и 27 гласови против. Законот беше поддржан од партијата Фидес на унгарскиот премиер Виктор Орбан и Христијанските демократи, кои се нејзин малцински коалициски партнер.
© Vecer.mk, правата за текстот се на редакцијата
