Претседателот на Соединетите Американски Држави, Доналд Трамп, изјави дека му е жал што Индија го нападна Пакистан.
„Штета. Тукушто слушнавме за тоа, токму кога влегувавме во Овалната соба, дознавме. Претпоставувам дека луѓето имаа навестување дека нешто ќе се случи врз основа на минатото, тие се борат долго време, знаете, тие се борат со децении и векови“, рече Трамп откако го надгледуваше положувањето заклетва на неговиот специјален пратеник, Стив Виткоф.
„Само се надевам дека ќе заврши многу брзо“, додаде Трамп.
Потсетуваме дека Индија објави дека започнала воена операција против Пакистан и дека ја погодила терористичката инфраструктура во Пакистан и Кашмир под пакистанска администрација, што претставува голема ескалација на тензиите меѓу двете земји.
„Ја следиме ситуацијата“
Американскиот Стејт департмент претходно соопшти дека „внимателно го следи развојот на настаните“.
„Свесни сме за извештајот, но во овој момент немаме никаква проценка да понудиме“, рече портпаролот. „Ситуацијата сè уште се развива и ние внимателно ја следиме.“
Државниот секретар Марко Рубио минатата недела разговараше со високи функционери од двете земји, додека тензиите брзо се зголемија по масакрот во индискиот Кашмир.
Рубио ги охрабри Индија и Пакистан да работат заедно за „деескалација на тензиите“, според соопштението за медиумите на Стејт департментот од 30 април за тие разговори.
© Vecer.mk, правата за текстот се на редакцијата
