Новиот германски министер за внатрешни работи, Александар Добриндт, изрази сомнежи во врска со можноста за забрана на десничарската партија Алтернатива за Германија (AfD), и покрај тоа што разузнавачката служба неодамна ја класифицираше како „екстремистичка“.
Според него, прашање е дали AfD ги исполнува строгите критериуми утврдени од Уставниот суд, како што е агресивно дејствување насочено против демократскиот поредок.
Наместо забрана, Добриндт смета дека на АфД треба да се спротивстави политички преку решавање на проблемите што доведоа до зајакнување на популарноста на таа партија.
Слично мислење има и идниот вицеканцелар Ларс Клингбеил, кој истакна дека долгата постапка за забрана не може да биде единствениот начин за борба против зајакнувањето на AfD, туку дека партијата треба политички да се маргинализира.
Во исто време, раководството на AfD тврди дека сегашните напади врз нив се политички мотивирани.
Шефицата на партијата, Алис Вајдел, ја обвини министерката во заминување Ненси Фезер за злоупотреба на безбедносните служби со цел дискриминација и рече дека АфД ќе стане владејачка партија во иднина, без оглед на притисокот.
© Vecer.mk, правата за текстот се на редакцијата
