Претседателскиот медал на слободата годинава ќе им биде доделен на 19 лица, меѓу кои и културни икони, политичари и активисти, јавува Би-би-си.
„Тие беа избрани затоа што се добри луѓе кои дадоа исклучителен придонес за својата земја и светот“, објави Белата куќа. Бајден ќе ги додели медалите денеска за време на церемонијата во Белата куќа.
Боно, чие вистинско име е Пол Дејвид Хјусон, веќе ја има добиено највисоката француска културна награда, почесен витез. Тој е познат по неговата борба против сиромаштијата и поддршката за пациентите со ХИВ. Винтур, една од највлијателните луѓе во светот на модата, е главен уредник на Вог од 1988 година и, меѓу другите хуманитарни проекти, помогна да се соберат повеќе од 20 милиони долари за истражување на СИДА. Таа, исто така, собра средства за уметнички организации во Обединетото Кралство по кратењата на финансирањето во 2022 година.
Меѓу добитниците се и милијардерот филантроп и главен донатор на Демократската партија Џорџ Сорос, како и американската политичарка Хилари Клинтон. Сорос, финансиер роден во Унгарија, беше една од целите на поштенските бомбашки напади во 2018 година, кои беа испратени до него и до другите критичари на Доналд Трамп. Клинтон, поранешен државен секретар на САД, ќе ја добие наградата неколку недели пред инаугурацијата на нејзиниот поранешен политички ривал. Таа загуби од Трамп на претседателските избори во 2016 година.
Меѓу добитниците на медалот се актерските икони Дензел Вашингтон и Мајкл Џеј Фокс, фудбалската ѕвезда Лионел Меси, пензионираниот кошаркар на Лос Анџелес Лејкерс Ервин „Меџик“ Џонсон и модниот дизајнер Ралф Лорен. Основачот на Американскиот филмски институт Џорџ Стивенс Џуниор е меѓу лауреатите како и поранешниот претседател на Центарот Кенеди, Дејвид Рубинштајн. Меѓу другите добитници се хуманитарецот и готвач Хозе Андрес, чија организација World Central Kitchen обезбедува храна за цивилите во воените зони и областите погодени од природни катастрофи, познатиот британски приматолог Џејн Гудал и едукаторот за популарна наука Бил Нај.
Постхумни почести ќе им бидат доделени на поранешниот јавен обвинител Роберт Кенеди, поранешниот секретар за одбрана Еш Картер, лидерот за граѓански права Фани Лу Хамер и поранешниот гувернер на Мичиген Џорџ В. Ромни. Претседателскиот медал на слободата, основан под претседателот Џон Ф. Кенеди, се доделува по препорака на надворешен советодавен одбор. Меѓу претходните добитници на оваа награда се најодликуваната гимнастичарка на сите времиња Симон Билс, оскаровката Мишел Јео и основачот на Apple, Стив Џобс.
© Vecer.mk, правата за текстот се на редакцијата
