Соединетите Американски Држави ќе го продолжат за дополнителни 30 дена исклучокот од санкциите за руската нафта, со кој се одобрува испорака и продажба на сурова нафта и нафтени деривати со руско потекло утоварени на бродови, изјави американскиот министер за финансии Скот Бесент. Тој на социјалната мрежа Х напиша дека оваа мерка ќе им овозможи на најранливите нации привремен пристап до руската нафта.
Според зборовите на Бесент, продолжувањето на овој исклучок ќе помогне во стабилизирање на пазарите на сурова нафта и ќе обезбеди енергенсите да стигнат до земјите кои се погодени од војната со Иран. Овој потег доаѓа во момент кога цените на енергијата растат поради конфликтот со Иран и претставува трето вакво привремено ублажување на ограничувањата, откако претходното изземање истече за време на викендот.
Критичарите на оваа одлука предупредуваат дека ваквиот чекор, иако со ограничен опсег, може да ги засили руските финансии, со оглед на тоа што приходите од нафтата и понатаму се клучен извор за финансирање на војната против Украина. Инаку, американските санкции наметнати врз рускиот енергетски сектор се на сила веќе со години, а секундарните санкции директно им се закануваат на сите компании кои продолжуваат да тргуваат со Москва.
© Vecer.mk, правата за текстот се на редакцијата
