Американскиот претседател Доналд Трамп му рекол на украинскиот претседател Володимир Зеленски за време на напнатиот состанок во петокот дека нема намера да ја снабдува Украина со крстосувачки ракети „Томахавк“ со долг дострел, барем засега.
Како што објави „Аксиос“, повикувајќи се на два извори запознаени со разговорот, Зеленски дошол во Вашингтон со цел да обезбеди ново оружје за украинската армија, но претседателот го пречекал во сосема поинакво расположение, само еден ден откако имал долг телефонски разговор со рускиот претседател Владимир Путин.
Според изворите, Трамп јасно рекол дека дипломатијата е негов приоритет сега и дека испораката на „томахавкот“ може да ги загрози тие напори.
Еден извор го опишал состанокот како „воопшто не лесен“, додека друг рекол дека „бил лош“.
„Никој не го кренал гласот, но Трамп бил исклучително строг“, рекол првиот соговорник на „Аксиос“. Друг додал дека „претседателот дал некои многу остри изјави, а во еден момент атмосферата станала доста емотивна“.
Средбата заврши по два и пол часа, кога Трамп рече:
„Мислам дека завршивме. Ќе видиме што ќе се случи следната недела“, алудирајќи на претстојните разговори меѓу САД и Русија. Според истите извори, Трамп планира средба со Путин во Будимпешта во следните неколку недели.
За време на разговорот со Зеленски, Трамп детално ја пренесе содржината од неговиот претходен телефонски разговор со Путин. Тој истакна дека сегашниот американски предлог за „дипломатско решение“ подразбира завршување на војната со замрзнување на сегашните фронтовски линии, што е многу тешко за Киев да го прифати.
По средбата, Трамп објави на својата мрежа Truth Social дека средбата била „интересна“ и „срдечна“, и додаде дека им рекол и на Зеленски и на Путин дека „време е да застанат таму каде што се“.
„Двајцата нека прогласат победа, нека одлучи историјата“, напиша Трамп пред да замине за Мар-а-Лаго без да разговара со новинарите.
Зеленски, од друга страна, веднаш по состанокот одржа видеоконференција со европските лидери, кои, според изворите, останаа збунети од ненадејната промена на американската позиција.
Недолго потоа, европските лидери почнаа да објавуваат координирани изјави за поддршка на Украина, што беше протолкувано како јасен сигнал дека разговорот во Белата куќа не поминал добро.
Силен притисок од Зеленски
На прес-конференција, Зеленски потврди дека разговарале за ракетите Томахавк, но рече дека се согласиле да не зборуваат јавно за тоа „за да се избегне ескалација“. На прашањето дали верува дека САД сепак ќе ја одобрат испораката, тој одговори: „Јас сум реалист“.
Според Аксиос, всушност, Зеленски силно го притиснал Трамп да ги одобри „томахавките“, но американскиот претседател останал цврст и не покажал никаква флексибилност.
За време на разговорот со европските лидери, британскиот премиер Кир Стармер предложил соработка со Вашингтон за создавање мировен план за Украина, по примерот на „планот од 20 точки“ на Трамп за Газа.
Генералниот секретар на НАТО, Марк Руте, исто така, предложи итен состанок на советниците за национална безбедност во текот на викендот.
Според началникот на кабинетот на украинскиот претседател, главната цел на Зеленски за време на неговата посета на САД била да ги обезбеди американските обврски не само за „Томахавк“, туку и за другите системи за оружје што Украина сака да ги набави.
Трамп, сепак, не даде никакви ветувања.
© Vecer.mk, правата за текстот се на редакцијата
