Министерката за внатрешна безбедност на САД, Кристи Ноем, најави дека Аргентина повторно е примена во програмата за безвизен режим, што им овозможува на странските државјани да патуваат до 90 дена во САД без виза.
САД ја отстранија Аргентина од оваа програма во 2002 година, откако многу Аргентинци почнаа да влегуваат нелегално во земјата, бегајќи од економска криза во својата татковина. Повторното придружување стана можно затоа што Аргентина има најниска стапка на надминат дозволен престој („overstay rate“) од сите латиноамерикански земји, изјавија од Министерството.
„Аргентина сега има најниска стапка на престој повеќе од дозволеното во цела Латинска Америка, а 25% повеќе Аргентинци патувале во САД во првите четири месеци годинава во споредба со лани — највисок пораст меѓу дваесетте најчести националности-туристи во САД“, соопшти Ноем во јавна изјава. „Така што правиме чекори Аргентина повторно да стане дел од програмата за безвизен режим.“
Новоста беше објавена при посетата на Буенос Аирес, каде што Ноем се сретна со аргентинскиот претседател Хавиер Милеј и неговиот тим.
Овој потпишан документ со министерката Вертхајн и министерката Булрич ја демонстрира нашата цврста соработка со Аргентина и заедничката желба за поддршка на законитото патување, а да се одвратат можни закани. Овој вид дипломатско лидерство, промовирано и од претседателот Трамп, ќе ја зголеми безбедноста на двете земји.
Иако ќе бидат потребни неколку години за целосно имплементирање, американското министерство вели дека е подготвено веднаш да го започне процесот за официјално означување на Аргентина како земја која повторно е дел од оваа престижна програма.
Оваа одлука ја одразува цврстата соработка меѓу претседателот Доналд Трамп и Милеј, кој изминативе години се вбројува во десно ориентираните светски лидери. Според аргентинското претседателство, постигнатиот договор е „јасна демонстрација на одличните односи меѓу двете држави“, со заедничка визија за соработка.
Ноем посебно го истакна ангажманот на Милеј во јакнењето на безбедноста на границите за двете земји.
ТРАМПОВА ЗАБРАНА ЗА ПАТУВАЊЕ: ШТО ТРЕБА ДА ЗНАЕТЕ ДОДЕКА 12 ЗЕМЈИ НЕ МОЖАТ ДА ВЛЕЗАТ ВО САД
Оваа иницијатива следи отприлика два месеца откако администрацијата на Трамп воведе визни и патни ограничувања за странски државјани од 19 земји, од кои 12 целосно се забранети за влез.
По министрите Роберт Ф. Кенеди Џуниор и Скот Бесент, Ноем е трет висок функционер од американската влада што го посети претседателот Милеј во Аргентина откако Трамп се врати на власт.
© Vecer.mk, правата за текстот се на редакцијата
