Американскиот специјален пратеник, Стив Виткоф, патува за Израел со задача да ја испита состојбата со испораката на хуманитарна помош во Газа. Овој потег доаѓа откако светските медиуми известуваат за сериозен глад во Појасот и зајакнати се повиците за итен прекин на огнот.
Виткоф за првпат од мај наваму повторно заминува во Израел. Се очекува тој од блиску да се увери дали заедничката иницијатива помеѓу САД и Израел – Фондацијата за хуманитарна помош на Газа – дава конкретни резултати во ублажувањето на ширењето на гладот.
„Претседателот сака да добие појасна слика за хуманитарната состојба во Газа, за да може соодветно да се помогне на цивилното население,“ изјави еден американски функционер за <em>Axios</em>. Се очекува Виткоф да пристигне во четврток.
Виткоф ја води дипломатијата на Белата куќа за да се постигне траен прекин на огнот меѓу Израел и Хамас од самиот почеток на мандатот на претседателот Трамп. Од неговата последна посета во мај, кога се сретна со американско-израелскиот заложник Едан Александер, не се врати во Израел.
Во меѓувреме, расте меѓународниот притисок за завршување на конфликтот и иницирање мировни преговори, а Франција и Велика Британија најавуваат дека би можеле да ја признаат палестинската држава поради незадоволството од недоволната хуманитарна помош во Газа.
Дури и претседателот Трамп беше отворено критичен кон тврдењата на премиерот Нетанјаху дека нема глад во Газа, изјавувајќи за медиумите: „[Палестинските] деца изгледаат навистина гладни.“
Џонатан Шанзер, висок потпретседател на Фондацијата за одбрана на демократиите, во разговор за Washington Examiner изјави дека нема јасни знаци за тензии меѓу Вашингтон и Ерусалим, но додава: “Сосема е јасно дека Израел мора да ги адресира овие обвинувања.”
„Не е изненадување што ова е тема на разговор и во САД, и во Израел, и на други места. Не гледам сериозен судир меѓу лидерите моментално, но внимателно треба да се следи развојот,“ вели Шанзер.
Во истиот период кога Виткоф подготвува посета на Израел, шефот на израелската разузнавачка служба Мосад, Давид Барнеа, престојува во Вашингтон и Њујорк на неформално патување.
Израелските медиуми јавуваат дека Барнеа бил виден како се моли кај гробот на ребето Менахем Мендел Шнерсон во Њујорк по неименувани разговори во Вашингтон.
Не е јасно дали средбите на Барнеа се директно поврзани со Фондацијата за хуманитарна помош на Газа. Како и Виткоф, и тој се занимава со низа прашања како хуманитарната криза, иранските нуклеарни програми, и нормализацијата на ситуацијата во Сирија.
Без разлика на деталите, Шанзер смета дека паралелните активности на двајцата официјални претставници сведочат за цврста координација меѓу владите, и покрај јавните несогласувања околу хуманитарното прашање.
„Видливо е блиското соработување меѓу двете држави и администрации – од најниските, до највисоките нивоа. Секогаш постојат повеќе теми за дискусија, а сега тоа е уште поизразено,“ вели тој.
„Кога гледате високи претставници постојано да патуваат, тоа е знак дека постојат притисоци и итни прашања кои бараат решение,“ додава Шанзер.
Трамп и неговата администрација продолжуваат јавно да ја поддржуваат израелската страна и се противат на идејата за две држави како решение за конфликтот, тврдејќи дека тоа само би го наградило тероризмот.
„Може да се каже дека со таквиот потег само ќе се награди Хамас. Не мислам дека заслужуваат тоа, искрено,“ изјави претседателот.
Во Газа сѐ уште се држат околу 20 израелски заложници, а според некои извори таму се наоѓаат и останките на до 50 лица.
© Vecer.mk, правата за текстот се на редакцијата
