Ајатолахот Хамнеи, за време на комеморацијата на претседателот Ебрахим Раиси, кој загина лани во хеликоптерска несреќа, денеска изјави дека „никој во Иран не чека дозвола од САД“ и додаде дека „Исламската Република има своја политика и насока до која ќе се држи“.
Коментарите на Хамнеи дојдоа во време кога индиректните разговори меѓу Иран и САД наводно продолжуваат, иако тој изрази сомнежи за нивниот исход. Неговите коментари ја одразуваат растечката фрустрација на Техеран од застојот во нуклеарните разговори, како и пошироките тензии во односите меѓу САД и Иран во последните години.
Портпаролот на Министерството за надворешни работи, Есмаил Багеи, за државната агенција ИРНА изјави дека „не е донесена конечна одлука за следната рунда преговори“ и дека „Исламската Република Иран го разгледува ова прашање додека ги анализира контрадикторните и постојано променливи позиции на американската страна“.
ИРНА, исто така, објави дека заменик-министерот за надворешни работи, Казем Гарибабади, изјавил дека Техеран добил предлог во врска со следната рунда индиректни преговори со Вашингтон и дека моментално го разгледува. /МИА
© Vecer.mk, правата за текстот се на редакцијата
