Осум мажи депортирани од САД пристигнаа во Јужен Судан во петокот откако беа држени неколку недели во Џибути додека нивната правна постапка се спроведуваше на суд.
Јужен Судан е на списокот на САД на кои им е забрането патување поради „криминал, киднапирање и вооружен конфликт“. Осуммината беа осудени за насилни злосторства во САД и или ги завршија или беа при крајот на издржувањето на своите казни, објавува Статиста.
Групата првично беше испратена кон Јужен Судан во мај. Сепак, тие беа пренасочени кон Џибути кога судијата Брајан Е. Марфи во Бостон рече дека на мажите не им беше дадена „значајна можност“ да приговорат дека депортацијата може да ги доведе во опасност. Според АП, групата беше протерана од САД само неколку часа откако доби известување, без можност да контактира со адвокати. Минатата недела, Врховниот суд ја поништи пресудата на судијата Марфи.
Случајот се споредува со многу критикуваниот и сега напуштен договор со Руанда на Велика Британија, бидејќи Јужен Судан не е земја на потекло за сите мажи, туку „трета земја“. Додека еден од осумте е од Јужен Судан, другите се од Куба, Лаос, Мексико, Мјанмар и Виетнам. Властите наведуваат дека повеќето од матичните земји на мажите одбиле да ги примат.
Според извештаите на „Њујорк тајмс“, САД имаат намера да ја прошират својата мрежа за депортации од трети земји, откако побарале или планирале да побараат од најмалку 58 земји да примат луѓе кои не се нивни државјани. Досега, осум земји наводно ја прифатиле понудата: Костарика, Ел Салвадор, Гватемала, Косово, Мексико, Панама, Руанда и сега Јужен Судан.
Од земјите во регионов во планот на Трамп за депортација, засега, е само Косово.
Земјите што администрацијата на Трамп ги одреди како можни дополнителни места за депортации се Украина и Сирија. Сепак, како што покажува оваа табела, поголемиот дел од 51-те земји наведени од „Њујорк тајмс“ се во Африка (31 земја), вклучувајќи ги Демократска Република Конго и Либија. Многу од овие земји се предмет на нова целосна или делумна забрана за патување во САД или се разгледуваат за таква.
Претходните депортации на државјани во трети земји веќе се случија оваа година. Ова ги вклучува повеќе од 130 Венецуелци испратени во затвор во Ел Салвадор и околу 200 мигранти, вклучувајќи 80 деца, од земји како Авганистан, Русија, Кина и Индија, испратени во Костарика.
© Vecer.mk, правата за текстот се на редакцијата
