Во последен момент пред истекот на крајниот рок, американскиот претседател Доналд Трамп одлучи на неодредено време да го продолжи примирјето со Иран.
Сепак, оваа одлука не значи деескалација на теренот, бидејќи претседателот истовремено потврди дека поморската блокада на стратешкиот Ормуски теснец останува во сила. Ваквиот потег доаѓа по целосниот крах на планираните мировни разговори во Пакистан, каде што двете страни не успеаја ниту да седнат на иста маса.
Трамп ги искористи социјалните мрежи за да ја појасни својата позиција, наведувајќи дека одлуката за воздржаност од нови напади доаѓа на барање на пакистанските посредници. Тој порача дека примирјето ќе трае сè додека Иран не достави прифатлив предлог или додека преговорите не завршат на еден или друг начин.
Претседателот беше дециден дека блокадата е единствениот инструмент кој може да донесе договор, упатувајќи остра порака дека алтернативата за иранските лидери е уништување на земјата.
Дипломатскиот неуспех стана очигледен кога беше откажано најавеното патување на потпретседателот Џеј Ди Венс во Исламабад. Претставниците од Техеран го одбија присуството на средбата, квалификувајќи ги барањата на Вашингтон како неразумни, додека иранската агенција „Тасним“ објави дека во моментов нема никакви изгледи за нивно учество во преговорите.
Овој последен развој на настаните претставува промена во реториката на Трамп, кој претходно се закануваше со директно бомбардирање и тврдеше дека војската е во целосна подготвеност за акција. Иако примирјето е технички продолжено, воената напрегнатост останува висока, особено по неговите претходни изјави дека е „многу малку веројатно“ да се одржи мирот без постигнување на конечен и сеопфатен договор.
© Vecer.mk, правата за текстот се на редакцијата
